Një grup studentësh gjakovarë po vazhdojnë të insistojnë dhe të bëjnë presion tek organet komunale që të zbritet çmimit i biletave të autobusëve nga Gjakova për në qytetet tjera universitare. Ata po kërkojnë që të zbritet çmimi i biletës së udhëtimit nga Gjakova për në Prishtinë, Pejë, Prizren dhe anasjelltas.
Sipas tyre çmimi prej 4 euro për relacionin Gjakovë – Prishtinë dhe 1.5 euro për relacionin Gjakovë- Pejë dhe Gjakovë- Prizren është i lartë dhe i pa përballueshëm për ta. Ata po kërkojnë që me ndërhyrjen e komunës dhe në bashkëpunim e marrëveshje me kompanitë private, çmimi për një udhëtim në Prishtinë të jetë 2 euro ndërsa për udhëtimet në Pejë e Prizren çmimi të jetë 1 euro. E për këto shqetësime, studentët gjakovarë disa herë kanë dërguar letra dhe kërkesa tek zyrtarët më të lartë komunal por deri më tani nuk ka pasur ndonjë lëvizje.
Sipas këtyre zyrtarëve, për zgjidhjen e këtij problemi do të nisin angazhimet shumë shpejtë, për faktin se deri më tani ndërmarrja “Stacioni i Autobusëve” nuk ka qenë e kompletuar me bord menagjues dhe staf, prandaj edhe ka mundësi që të fillojë negociatat për zbritjen e çmimit të biletës.
Në fakt është Shoqata e transportuesve ajo që mundë të negocio me komunën për uljen e çmimit të biletës për student. Përpjekjet e viteve të shkuara nuk kishin dhënë rezultat.
