Me rastin e 7 majit, Organizata “Thirrjet e Nënave” ka përkujtuar sot të gjithë ata që u rrëmbyen, u vranë e u zhdukën në këtë ditë. Përmes një komunikate për media, kjo shoqatë ka përkujtuar mbi 40 meshkuj të lagjes Mulla Jusuf dhe dhjetëra tjerë të lagjes së Çabratit. “Shoqata “Thirrjet e nënave” në Gjakovë, përkujton 7 Majin 1999 – ditën kur në Çabrat zhvillohej luftë e ashpër mes Ushtrisë Çlirimtare të Kosovës dhe forcave ushtarake e policore serbo-malazeze. Në këtë ditë u vranë shumë banorë të kësaj lagjeje, në mesin e të cilëve edhe 17 vjeqarja Yllka Domi”, thuhet në komunikatën e organizatës “Thirrjet e Nënave”. “Po këtë ditë banorët e lagjes Mulla Jusuf, duke parë se gjithçka po digjej dhe po ushtrohej dhunë e masakra ndaj popullatës, u detyruan ti lëshojnë shtëpitë e tyre dhe dolën në rrugë. Tek ura e Taliqit, këto familje bien pre e forcave policore serbe në bashkëpunim me serbët lokal të uniformuar. Ne ketë kolonë te banorëve te kësaj lagjeje u ndanë mbi dyzet meshkuj nga familjet e tyre dhe u dërguan në drejtim të panjohur pa asnjë shkas vetëm e vetëm pse ishin shqiptarë dhe mbrojtën vatrat e tyre”, përfundon kjo komunikatë.
