Agjencia e Akreditimit e Kosovës i ka akredituar në nivel institucional për tre vjet tri universitetet e reja të themeluara nga Qeveria e Kosovës: atë të Mitrovicës, Gjilanit dhe Gjakovës, si dhe Universitetin e Prishtinës për pesë vjet.
Sipas këtij vendimi është akredituar Universiteti i Gjakovës “Fehmi Agani” në nivel institucional për periudhën 3 vjeçare, me programet e studimit: Gjuhë Shqipe dhe Letërsi Shqipe, ndersa programet e studimit: Edukim Parashkollor, Edukim Fillor, Infermieri, Mami, Gjuhë dhe Letërsi Angleze akreditohen për periudhën 2 vjeçare. Programi i studimit: Fizioterapi, që ishte vitin e kaluar akademik, këtë radhë nuk është akredituar nga Agjencia e Akreditimit të Kosovës.
Përmes një komunikate për medie, Agjencia ka bërë të ditur se në nivel institucional janë akredituar edhe tri institucione private të arsimit të lartë, derisa nuk janë akredituar 28 programe nga bartësit privat të arsimit të lartë. Nuk janë akredituar nëntë programe në institucionet publike, derisa janë shtyrë për një fazë tjetër tri vendime në institucionet publike të arsimit të lartë dhe katër në ato private.
