Vapa 35 gradë me të mirat e të këqiat e veta

Piku i stinës së verës ka ardhë me temperatura të larta të ajrit të cilat janë bërë shkas që një numër i bashkëqytatërve të kërkojnë freski në ambiente të përshtatshme banimi e qëndrimi, por edhe në vendpikniqe të Gjakovës. Brigjet e Erenikut, Drinit dhe lumenjve tjerë kanë mjaftë pushues ditor, ndërkohë që qendra rekreative  Shkugëza po shënon numër të madh të adhuruesve të natyrës që po e vizitojnë gjatë tërë ditës.

E në pikun e vapës uji i pijes është freskuesi më i mirë. Gjakova është me fat që në të këtilla temperatura ka ujë në pjesën më të madhe,  24 orë pandërprerë.  Mirëpo, për shkak të konsumimit tej mase por edhe keqpërdorimeve herë- herë ka edhe rënie të shtypjes posaçërisht në shumëkatëshe, për çka në Kompaninë Rajonale të Ujësjellësit  Radoniqi apelojnë për kursim të ujit të pijes dhe për ndalim rigoroz të keqpërdorimit, sepse në të kundërtën do të pasojnë dënimet për keqpërdoruesit.

Temperaturat e larta të ajrit bashkë me frekuencën e madhe të automjeteve nëpër rrugët tona  po shkaktojnë nervozizëm nga pjesëmarrësit në trafik e bashkë me të edhe aksidente trafiku. Disa shoferë të padurueshëm nga vapa, me ndalime e parkime vend e pavend  po thyejnë rregullat e trafikut duke tejkaluar kolona dasmoresh e duke bllokuar rrugë me parkimet nëpër trotuare. Padyshim se rruga nëpër Çarshinë e Vjetër që qon tek ambulanca dhe lidhë me pjesën tjetër të qytetit pastaj kyçjet në rrugën kryesore Skënderbeu nga Blloku i ri, dhe kyçja në rrugën transite qindra metra më larg,  po paraqesin fyt të ngushtë për trafikun.

Fatmir Berisha, udhëheqës i sektorit të trafikut në Kuvendin komunal të Gjakovës, thekson se një ngarkesë të tillë të madhe vështirë se e përballojnë edhe qytete tjera me më shumë rrugë të gjëra. Gjakova sipas tij ka trashëguar shumë rrugë të ngushta që janë vitale për qarkullimin e trafikut. Lidhur me këtë shqetësim të pjesëmarrësve në trafik, Berisha thekson kujdesin e shtuar të pjesëmarrësve në trafik, duke respektuar rregullat e trafikut dhe duke mos u ndaluar para bizneseve nëpër rrugët e ngushta, por të kërkojnë vende adekuate parkimi.

Berisha ka përmednur “fytat e ngushtë të trafikut” në rrugën Qazim Bakalli në Çarshinë e Vjetër, pastaj rrethrrotullimin në lagjen Mula Jusuf, tek sheshi Agron Rama dhe në rrugën “Skenderbeu”.