Vdekja e gruas shtazënë nga Gjakova, lajm i rëndë për Ministrin e Shëndetësisë Vitia

Rasti fatal i humbjes së jetës së gruas shtatëzënë dhe foshnjes nga Gjakova ka qenë lajm tronditës.  Ministri në detyrë i Shëndetësisë, Arben Vitia ka thënë se ishte lajm i rëndë vdekja e gruas nga Gjakova e cila pritej të bëhej nënë.

Ai në rrjetin social Facebook ka postuar këtë shkrim:

“Sot morëm njoftimin e rëndë për humbjen e jetës së bashkëqytetares sonë. Ajo priste të bëhej nënë. Komplikimet nga Covid-19 ia prenë jetën dhe ëndrrën në mes.

Marrim pjesë në këtë dhimbje të dyfishtë të familjes e miqve!

Nuk ka fjalë ajo çfarë ndjejmë ne dhe gjithë stafi mjekësor që e asistoi gjatë tërë këtyre ditëve të vështira.

Të nderuar qytetarë, na duhet forcë e disiplinë për të shmangur dhembje të tjera.

Të mbrojmë veten dhe të dashurit tanë. Jeta ka vlerë sepse ajo e bën të mundur çdo shpresë e çdo projekt.

Kurrë nuk është mjaft kujdesi. Le të mos shpërqendrohemi nga mbrojtja në këtë betejë që hera – herës i kapërcen mundësitë tona të deritanishme.

Të zbatojmë rregullat, të mbrojmë e shpëtojmë jetë. Duhet të besojmë realisht që kjo fazë është e përkohshme dhe nuk duhet të rrezikojmë një jetë të tërë nga pakujdesitë në këto pak javë.”, ka përfunduar minsitri I Shëndetësisë në detyre Arben Vitia.