Veprimtari të shumta sportive për pesë vjetor

Përvjetori i pestë e Pavarësisë së Kosovës , në komunën e Gjakovës do të shënohet me një varg veprimtarish përkujtuese e  kulturore, ndërkohë që do të dominojnë ato sportive të cilat nisin që nga e mërkura e kësaj jave.

Veprimtaritë sportive me rastin e shënimit të pesë vjetorit të Pavarësisë së Kosovës do të nisin me futsallin. Me 13 shkurt, Kampionia e Kosovës në futsall,  Klubi i Futsallit Liburni nga Gjakova do të takohet me ekipin e Llapit të Podujeves, kampionin e Ligës së parë të futsallit. Fillimisht ishte planifikuar që kjo ndeshje të zhvillohet në sallën e shkollës Hysni Zajmi, mirëpo ajo u verifikua se nuk i plotëson kushtet për ndeshje të tillë, prandaj u vendos që kjo ndeshje të zhvillohet në sallën sportive të Junikut.

Me 14 shkurt mbahet turneu në shah me organizim të klubit të shahut vëllaznimi. Turneu fillon në orën 16.00 dhe mbahet në lokalet e klubit. Ndërkaq me 16 shkurt mbahet turneu individual në shigjetari. Kjo garë do të mbahet në shkollen fillore “Zef Lush Marku” në Brekoc. Po këtë ditë, poqese do të ketë borë,

do të mbahen edhe garat komunale të skitarisë me organizim të klubit të skitarëve pashtraku.

Ndryshe sa i takon aktiviteteve të përgjithshme të festës, ato do të kulmojnë  me 17 shkurt me homazhe në varrezat e dëshmorëve, akademinë solemne të Kuvendit Komunal dhe programin kulturor skenik në Pallatin e kulturës Asim Vokshi.