Gjakova po profilizohet si qyteti më shqiptarë i shqiptarëve

Gjakova po synon të bëhet kryeqendër e kulturës shqiptare. Tashmë  ka filluar festen e verës me një manifestim kulturor që zgjatë gjatë  muajve Korrik e Gusht. Me moton “Kultura shqiptare festohet n’Gjakovë”, festivali sjell performanca artistike, muzikë dhe aktivitete të ndryshme që nderojnë trashëgiminë kulturore të shqiptarëve. Në fakt me performancën e bukur të artistit Endrit Xërxa  dhe bendit të tij,   në Parkun Kulturor “Ali Podrimja mbrëmë u hap zyrtarisht, për herë të dytë në Gjakovë, festivali “Ditët e Shqiptarit”, i organizuar nga Fondacioni për Gjakovën dhe Komuna e Gjakovës.

Mbrëmë e premte,  dhe sonte e shtune,   zona e Parkut kulturor dhe shtegu i lumit Krena me zonat përreth ka qenë mjaftë e gjallëruar me bashkëqytetarë e mysafir nga të gjitha trojet shqiptare.

Në hapje të Fetsivalit Ditët e Shqiptarit, kryetari komunës Ardian Gjini, u shpreh se “Gjakova do të mbetet gjithmonë një qytet i hapur për kulturën.  Ky festival, sipas tij,  do të sjellë ditë të bukura plot art, muzikë dhe atmosferë shqiptare, duke e kthyer Gjakovën në skenën më të bukur të verës. Ai ka falënderuar ekipin që është angazhuar për këtë festival.

Ndërkaq, Ermal Hasimja nga Fondacioni për Gjakovën tha se me këtë festival po mundohemi që Gjakovën ta profilizojmë si qyteti më shqiptarë i shqiptarëve.

Në natën e parë të festivali u shfaq  koncerti i grupit Blla-blla në Çarshinë e madhe.

Në ditën e dytë të festivalit të shtunën, në shkollën e muzikës Prenk Jakova,  sopranoja shqiptare  e njohur në arenën ndërkombëtare  Ermonela Jaho zhvilloi  bashkëbisedim me artistët e rinj kosovar me 7 këshillat e saj . Në një atmosferë të ngrohtë dhe frymëzuese, sopranoja Ermonela Jaho ka ndarë me ta copëza nga zemra dhe jeta e saj artistike. Nën temën “7 këshillat e mia për artistët e rinj”, ajo i ftoi të mos heqin dorë kurrë nga ëndrrat, duke i kujtuar se arti lind nga dashuria dhe përkushtimi i shpirtit.

Në mbrëmje u bë promovimi i librit për Qamilin e vogël nga autoret Krenar Doli dhe Bestar Vula.

Te parku Ali Podrimja sonte ka jehuar kënga e bukur qytetare në interpretim të  Art Orkestra me solistët Vegim Peja, Dren Zhuniqi dhe Ardit Tafarshiku.

Në Çarshinë e Jupave  u shfaq koncert me muzikë artistike.

Atmosferë fantastike u krijua në Çarshinë e madhe ku para një numri të madh të vizitoreve u prezantua   grupi Offchestra .