Tejmbushet Liqeni i Radoniqit, pa merak për ujë gjatë vapës

Rreth 18 milion metra kub ujë është mbledhur në Liqenin e Radoniqit  duke arritur kuotën  në 456 metra të nivelit mbidetar që ka bërë që më 3 maj 2014 në orën 4 të mëngjesit të filloi derdhja e ujit  duke gëzuar rreth 250 mijë banorë të Gjakovës, Rahovecit dhe të disa fshatrave të Prizrenit se edhe në ditët e vapës së verës,  në krojet e tyre do të kenë ujë të bollshëm për pije.

Drejtuesit e KRU’Radoniqi’ e kishin planifikuar tejmbushjen me 15 maj, mirëpo reshjet e fundit të shiut si dhe përkushtimi i punonjësve të kompanisë për të menaxhuar rrjedhat e ujërave duke i sjellë në liqe, bënë që kjo të arrihet dy javë më parë. Drejtues të kompanisë Radoniqi ftuan gazetarët që nga afër të ndjekin procesin e tejderdhjes së ujit  që konsiderohet si një garanci e furnizimit 24 orësh të qytetarëve me ujë të pijes. Me arritjen e këtij niveli, veç sasisë së ujit është arritur të ngritët edhe cilësia duke u mbushur liqeni me ujë të freskët, e në anën tjetër duke u pastruar uji i fundërruar i cili në një pjesë shfrytëzohet edhe për ujitje. Aktualisht prodhohet  ujë cilësorë me parametrat  fiziko-kimik dhe bakteriologjik me kapacitet prej 500 deri në 600 litra në sekondë.