60 të shëruar për 24 orët e shkuara, 22 pacientë pozitiv janë në Spitalin e Gjakovës

Numri i të shëruarve nga Covid 19, gjatë 24 orëve të shkuara në komunën e Gjakovës ka shënuar rritje. Janë shëruar 60 pacientë duke e ngritur numrin e përgjithshëm  të të shëruarve në  1 mijë e 850.

Të mërkurën është raportuar për 10 raste të reja të të infektuarve me covid 19 duke e ngritur numrin e përgjithshëm në  2 mijë e 151, ndërsa virusit korona nuk kanë arritur ti mbijetojnë 95 persona të infektuar.

Aktualisht në komunën e Gjakovës janë 206 raste aktive me covid 19.

Spitali i përgjithshëm Isa Grezda në Gjakovë mbetet derë e hapur për pacientët e infektuar me virusin Corona. Sipas raportit të sotëm, në repartet e këtij spitali, nën përkujdesjen e mantelbardhëve janë 55 pacientë, prej tyre 22 janë të konfirmuar pozitiv, ndërkaq negativ janë 27 pacientë. Të pakonfirmuar janë 6 pacientë. Me oksigjenoterapi janë 31 pacientë ndërsa në gjendje më të rënduar janë 2 pacientë që janë në respirator. Nga stafi mjekësor sot nuk ka asnjë të infektuar.