Shumë familje me dekada e kanë tejkaluar dhe po e tejkalojnë gjendjen e vështirë sociale me ndihmën e të afërmve, miqve dhe shoqatave të ndryshme që jetojnë e punojnë në vende të ndryshme të botës. Në procesin e regjistrimit të diasporës, deri më tani janë regjistruar rreth 400 mijë qytetarë të Kosovës që jetojnë në vende të ndryshme të Evropës dhe botës. Në bazë të regjistrimit të deritashëm, vërehet se numri më i madh i qytetarëve të Kosovës jetojnë në shtetin e Gjermanisë, pasuar nga Zvicra dhe Shtetet e Bashkuara të Amerikës. Nga komuna e Gjakovës konsiderohet se pos Gjermanisë e Zvicrës edhe në shtetet Skandinave punojnë një numër i madh i gjakovarëve që sjellin ndihma për familjet e veta në Gjakovë.
Por remitencat e pranuara në Kosovë, sipas të dhënave të fundit të Bankës Qendrore të Kosovës të cilat flasin për gjashtë muajt e parë të këtij viti, kanë shënuar rënie krahasuar me periudhën e njëjtë të vitit të kaluar. Vlera e parave të dërguara nga qytetarët e Kosovës të cilët jetojnë dhe punojnë në vende të ndryshme të botës, sipas këtyre të dhënave ishte 329.6 milionë euro, që paraqet një rënie vjetore prej 2.7 për qind. Rënien e nivelit të remitencave, në Odën Ekonomike të Kosovës, e quajnë shqetësuese, për faktin siç thonë: “këto para janë një burim i rëndësishëm i financimit të konsumit në Kosovë dhe njëra ndër shtyllat kryesore që Kosova të arrijë një stabilitet social dhe një qëndrueshmëri. Kjo rënie e remtiencave fillimisht ka të bëjë me faktin se si shtet nuk kemi treguar gatishmëri që t’i motivojmë edhe diasporën për të ndihmuar më tepër. E dyta është si pasojë e krizës financiare dhe globale ekonomike, e cila ka koston e vet”, theksojnë në Oden Ekonomike.