STUDIMET DHE FUTBOLLI BASHKË
Futbollisti i shquar i Vëllaznimit Lorik Rudi ka një veçanti nga të tjerët. Ai është i suksesshëm në dy fronte. Krahas futbollit, stërvitjeve, lojërave të vazhdueshme, gëzimeve për aksionet e bukura dhe golave të shënuar, Loriku ka vazhduar shkollimin superior. Muajin e kaluar ka përfunduar studimet 4 vjeçare në drejtimin – Kulturë Fizike dhe Sport, duke mbrojtur temën “Didaktika e trajnimit në lojën e Futbollit”. E ka përzgjedhur sepse është sportist dhe gjithmonë ka pasur dëshirë që të mësoj sa më shumë për sportin. Ai është rritur në një familje sportistësh. Sport të preferuar kanë skijimin. Po të mos kishte arritur suksese në futbooll Lorikun sigurisht se do ta takonim shtigjeve me borë në ndonjë garë sllallomi. Ky ishte shkas për bisedën me të.
Si kanë ecur futbolli dhe shkollimi në karrierën tuaj prej sportisti. A e kanë plotësuar njëra tjetrën apo e kanë penguar?
Futbolli dihet e kam pasur pasion si i vogël dhe asnjëherë nuk jam ndarë nga ai. Normalisht këtë nuk mund t”ia kisha arritur pa ndihmën dhe përkrahjen e pa kusht të familjes time, të cilët më kanë përcjellur në secilin hap. Ata ende janë aty në ulëset e stadiumit të gjithë bashkë për të më përkrahur, gjithmonë në secilën ndeshje dhe kudo që luaj. Sa i përket Fakultetit, meritat i takojnë nënës sime, ajo më ka shtyrë më shumë që të studioj dhe ti përfundoj ato. Në fillim ishte pak vështirë por duke marrë parasysh që kam studiuar Shkencat Sportive dhe vet merrem me Futboll, nuk e kanë penguar aspak njëra-tjetrën por e kanë plotësuar shumë .
Pse e zgjodhët futbollin si sport të karrierës?
Sepse është “Loja më e bukur në Botë”. Nuk mund ta paramendoj jetën time ndryshe – pa Futboll.
Krahas futbollit a e keni edhe ndonjë sport përzemër?
Po krahas Futbollit kam edhe një sport për zemër dhe ai është skijimi dhe më pëlqen shumë si sport, edhepse është sport sezonal. Këtë e kam trashëguar nga babi, ai na ka shtyrë të gjithëve të merremi me skijjim pasi që ai ka qenë dhe është skijator shumë i zoti, dikur garist, sot është trajner skijimi. Motra e vogël i ka ndjekur hapat e tij, ajo është skijatore shumë e mirë gariste, kurse ne të tjerët skijojmë vetëm për qejf.
Kur keni nisur të aktivizoheni në klub si futbollist dhe cili është rrugëtimi i deritashëm?
Fillimisht kam qenë në dy shkolla të futbollit në Akademinë “Faton Domi” dhe “Make Up” – aty kam marrur hapat e parë nga trajner shumë të mirë. Kurse në KF Vëllaznimi jam aktivizuar që nga mosha 15 vjeçare tek juniorët fillimisht pastaj nga mosha 16 vjeçare kam kaluar tek Seniorët. Ka pasur edhe oferta për të kaluar në ekipe tjera, por unë kam vazhduar që ti qëndroj besnik ekipit të Zemrës, pasi që kanë besuar në mua qysh në moshë shumë të re dhe unë jam munduar që të ju shpërblej besimin. Kam qenë pjesë edhe e ekipit të Kombëtares së Kosovës për grupmoshat U21. Deri më tani jam shumë i kënaqur me rrugëtimin tim.
Çka duhet të disponoi një sportist i dalluar siç jeni ju?
Një sportist i dalluar duhet të disponoi krahas talentit edhe punën, disiplinën dhe përkushtimin.
Në cilat pozita në skuadër ndjeheni më i suksesshëm?
Roli im natyral është mesfushor ofanziv dhe normalisht që aty ndjehem më rehat por edhe në pozitat tjera që luaj jo rrallë herë, për ata që e përcjellin Vëllaznimin më kanë parë shumë shpesh duke luajtur edhe pozitat tjera, edhe aty përkushtohem maksimalisht dhe ndjehem gjithmonë mirë kur luaj.
Pas shkollimit të mesëm keni përfunduar edhe Fakultetin. Cilin dhe pse e zgjodhët atë?
Unë muajin e kaluar kam përfunduar studimet 4 vjeçare në drejtimin – Kulturë Fizike dhe Sport, duke mbrojtur temën “Didaktika e trajnimit në lojën e Futbollit”. E kam përzgjedhur sepse jam sportist dhe gjithmonë kam pasur dëshirë që të mësoj sa më shumë për sportin.
Si kanë ecur studimet dhe angazhimi në Vëllaznim?
Studimet dhe angazhimi në Vëllaznim kanë ecur mjaft mirë deri më tani shpresoj që edhe në të ardhmen të vazhdoj kështu.
Keni filluar edhe studimet për master. Cili është specializimi?
Po kam filluar edhe Studimet Master në drejtimin e njëjtë si në Studimet Bachelor – Kulturë Fizike dhe Sport, dhe si temë për të bërë hulumtim normalisht që do të zgjedh diçka rreth Futbollit.
Gjatë karrierës cili ka qenë momenti më i gëzuar dhe ai më dëshpëruesi?
Momenti më dëshpërues ka qenë rënja nga Superliga para dy viteve, kurse më i gëzueshmi ishte inkuadrimi në Superligë pas dy vitesh qëndrimi në Ligën e parë.
Në këtë edicion të superligës keni treguar formë të mirë. Ku është arsyeja?
Besoj që forma e mirë ekipore ka bërë që edhe paraqitjet e mia individuale të rriten gradualisht.
Sa jeni i shoqërueshëm me bashkëlojtarët dhe sa ka ndikim një gjë e tillë në rezultatet e përgjithshme të skuadrës?
Kemi një shoqëri të shëndoshë dhe kjo besoj që ka një rol kryesor në rezultatet e përgjithshme të skuadrës . Shumë prej bashkëlojtarëve nuk i kam vetëm shokë të ekipit por me disa që njihemi që në fëmijëri i kam shokë për gjithë jetën.
Nëse i bëni një vështrim ecurisë së deritashme të stinorit vjeshtor, sa jeni të kënaqur?
Jam shumë i kënaqur me rezultatet e deri tanishme, me pak më shumë fat Vëllaznimi do të ishte ndoshta në vendin e parë, por ne do të vazhdojmë të luajmë dhe të shohim nga e ardhmja me shumë përkushtim për ti arritur synimet tona.
Ku e shihni skuadrën në fund të këtij kampionati?
Siç dihet ne kemi edhe probleme, e që janë ato financiare, duke shpresuar që ato të rregullohen sa më shpejtë në fund të këtij kampionati skuadrën tonë e shoh aty ku e ka pasur gjithmonë vendin – në krye të tabelës.
Sivjet Vëllaznimi shënon 90 vjetorin e themelimit. Si ndjehet Loriku në një jubile të tillë?
Ndjehem shumë i priveligjuar që bart fanellën e këtij klubi kaq të vjetër dhe të madh Kosovar siç është Vëllaznimi. Do të festojmë duke e rikthyer Vëllaznimin ku e ka vendin, për ti mbushur plot zemrat e tifozëve tanë, që gjithmonë i kemi mbrapa dhe i falënderojmë për përkrahjen.
Familja për Lorikun është e shenjtë. Ai këtë sukses ia dedikon pikërisht familjes e cila e ndjek hap pas hapi në rrugëtimin e tij prej sportisti. Në të gjitha ndeshjet , qoftë në Gjakovë apo edhe në terenet jashtë Gjakovës, me Lorikun është edhe një pjesë e familjes. Ata e inkurajojnë për angazhime dhe suksese të reja.
