Klubi i basketbollit Vëllaznimi definitivisht tërhiqet nga superliga. Bordi i Federatës së Basketbollit të Kosovës në mbledhjen e djeshme kontstatoi edhe një herë se Klubi i Basketbollit Vëllaznimi duke mos qenë në gjendje të përmbushë obligimet ndaj FBK-së dhe duke mos pasur palestër në dispozicion dhe në mungesë të kushteve për garim korrekt në Superligë, tërhiqet nga garimi në Superligë për edicionin 2013- 2014. Në komunikatën e udhëheqësisë së klubit dërguar medieve një ditë pasi Federata kishte marrë vendim, theksohet se përkundër përpjekjeve të parreshtura, si dhe kërkesave të dështuara për sponzorim, të bëra nga ana e anëtarëve të Bordit, si dhe vullnetarëve entuziastë, të cilët së pari iu drejtuan Komunës së Gjakovës, e pastaj edhe subjekteve tjera afariste, prapëseprap të gjitha këto përpjekje dhe kërkesa hasën në veshë të shurdhër dhe KB “Vllaznimi” nuk arriti t’i sigurojë fondet e nevojshme për garim të suksesshëm në Superligën e Kosovës. Kjo bëri që udhëheqësia e zgjëruar e klubit të mbledhet urgjentisht dhe të diskutojë rreth situatës alarmante dhe të merr një vendim rreth vazhdimit të punës dhe aktiviteteve në të ardhmën. Mori vendimin për t’i lëshuar vullnetarisht garat në Superligën e Kosovës dhe që në sezonin 2013/ 2014 të garojë në Ligën e Parë të Kosovës. Mjetet financiare, të nevojshme për pagesën e kuotizimit do të sigurohen nga vetë anëtarët e Bordit dhe vullnetarët entuziastë, kryesisht ish basketbollistë. Mes tjerash, u diskuta edhe rreth përzgjedhjes së trajnerit, me ç’rast për trajner të parë u zgjodh punëtori i palodhshëm sportiv dhe legjenda e basketbollit gjakovar, Hashim Rraci, i cili qyshse katër javë më parë, në mënyrë vullnetare, e kishte marrë përsipër zhvillimin e përgatitjeve me lojtarë, thuhet në kumtesen e KB “Vëllaznimi” të nënshkruar nga Ardian Koshi.
