Flet i vëllai Valon Shehu: Vigani i ka provuar të gjitha, prisni surpriza
“Ta shijojë në maksimum ‘BB’, edhe po krijoi ndonjë romancë s’ka gjë të keqe”
Vigan Shehu është djaloshi që është bërë pjesë e spektaklit “Big Brother 6”, së bashku me banorin tjetër Edber Laho. Ndërsa ne morëm një rrëfim të vëllait, Valonit, i cili për publikun shqiptar tashmë është i afirmuar si këngëtar i njohur. Valoni rrëfen më shumë rreth vëllait të tij, Viganit, për personalitetin, dëshirat dhe pasionet e tij. Për ta njohur më shumë atë, lexoni intervistën në vazhdim…
Keni qenë gjithë familjarët dakord që Vigani të futet në BB?
Në momentin kur kuptuam se Vigani ka shprehur dëshirë të hyjë në BB, mbetëm pak të habitur, megjithatë ishte një vendim i tij, pasi është shprehur se do të sfidojë veten me këtë mundësi të reality-shoë. Kurse neve na mbetet vetëm ta mbështesim dhe t’i japim përkrahjen tonë familjare dhe morale.
Si e shihni konkurrencën brenda?
Patjetër që është konkurrencë e fortë aty brenda, ku debatohet me mjaft zgjuarsi. Unë i uroj dhe i dëshiroj të fitojë ai që është më i miri dhe që e meriton të jetë i pari.
Ai po merret me modelizëm në Kosovë, mendon se futja në këtë spektakël është promovim i mirë për të edhe në Shqipëri?
Ka vite që Vigani merret me modelizëm, që nga spektakli “Unë jam top model”, në Kosovë, duke vazhduar me sfilata edhe në Shqipëri, si dhe pjesëmarrja e tij në “Miss&Mister Albania”, ku Vigani ishte në Top5. Tani, me futjen e tij në “BB”, është një vazhdueshmëri e patjetër që do e ndihmojë dhe ky spektakël në promovime të tjera.
Cilat janë synimet e tij, sa e përkrahni ju, çfarë tipi është, cili është sekreti i tij?
Synimet e tij janë të përfundojë fakultetin dhe të vazhdojë studimet master në drejtimin bankar dhe financë, ku vërtet ai ka talent. Synimin e tij ai di ta realizojë me punë dhe përkushtim të madh. Unë si vëlla më i madh patjetër që e mbështes, kemi marrëdhënie shumë të mira, e ndihmojmë njëri-tjetrin në çdo aspekt. Vigani nuk e neglizhon punën, është korrekt, tip sportiv, gjë që e tregon edhe fiziku i tij, njëkohësisht merret edhe me muzikë, është tip i qetë dhe i hareshëm. Sa i përket sekretit, vetë fjala tregon domethënien e saj.
Ka lënë ndonjë lidhje dashurie në Kosovë?
Vigani ka shumë shoqe të mira, por nëse ka të dashur, këtë nuk e di.
Po brenda shtëpisë mund të krijojë ndonjë romancë, cila do të ishte ajo që do e fitonte zemrën e tij?
Po edhe mund të krijojë ndonjë romancë, asgjë të keqe nuk ka. Le ta shijojë “BB” në maksimum. Se cila do të ishte ajo, varet nga shija e tij.
Na e përshkruaj me pak fjalë vëllain prej fëmijërisë e deri më tani…
Fëmijë ka qenë shumë i urtë, i sjellshëm dhe nxënës i dalluar. Që në fillore, nga klasa e pare, ka qenë me një shoqatë që merret me trajnimin e fëmijëve të Kosovës në muzikë, që quhet “Shropshir Music Children” nga Amerika. Aty Vigani ka mësuar të këndojë dhe njëkohësisht ka mësuar të luajë në shumë vegla muzikore. Ka mbaruar shkollën për klarinetë, ndërsa në të mesmen ka qenë futbollist i skuadrës së Gjakovës deri në fillimin e studimeve. Pjesëmarrës në shumë evente muzikore, sfilata, reklama e videoklipe.
Burimi: Panorama.com.al
