Friday, March 29, 2024
Kulturë

Radio Gjakova kremtoi 41 vjetorin e fillimit të punës

Nga një program 3 orësh në ditë,  para 41 vitesh, sot Radio Gjakova transmeton 24 orë program,  që falë teknologjisë informative dëgjohet në gjithë botën. Zëri i kësaj radioje dëgjohet në shumë familje gjakovare si zë i besueshëm i informacionit dhe si zë i këndshëm i argëtimit dhe pasqyrimit të traditës së lashtë të qytetit për artin, kulturën, muzikën dhe sportin.

Radio-Gjakova dje me një program të larmishëm e  shënoi 41 vjetorin e fillimit  të punës dhe veprimtarisë së suksesshme. Pikërisht më 9 Nëntor të vitit 1979, Radio Gjakova si medium i parë lokal i informimit në komunë, filloi me realizimin e misionit të informimit të qytetarëve për rrjedhat aktuale, duke u bërë njëkohësisht misionare e afirmimit të vlerave të shumta të traditës kulturore të kësaj treve. Që nga ajo ditë, Radio Gjakova pasqyroi në mënyrë të denjë dhe të besueshme realitetin i ngjarjeve dhe zhvillimeve aktuale në komunë.

Përmes valëve të sajë, të cilat u bënë ushqim i përditshëm shpirtërorë i mijëra dëgjuesve, u transmetuan qindra e qindra emisione zhanresh të ndryshme duke filluar nga emisionet argëtuese muzikore e deri tek ato dokumentare, përmes të cilave u shënuan ngjarjet më të rëndësishme të historisë së bujshme të kësaj treve. Këtë mision Radio Gjakova, anipse me sfida jashtëzakonisht të mëdha,  po e vazhdon edhe më tej duke synuar ta qojë ende më përpara zhvillimin e saj të përgjithshëm programor. Me rastin e këtij përvjetori, anipse në rrethana të vështirësuara me pandeminë Covid 19,  redaksia e Radio Gjakovës nga mëngjesi e deri natën vonë me prezantimin e grupeve muzikore dhe solistëve, me muzikë e humor,   transmetoi program festiv informativ dhe argëtues. 

Leave a Reply

Your email address will not be published. Required fields are marked *