Me nderime dhe homazhe, është shënuar 17 Maji, Dita e Dëshmorëve të Komunës së Gjakovës. Zyrtarë të Qeverisjes Lokale, asambleistë dhe përfaqësuesit e Organizatave të dala nga lufta, kanë bërë homazhe në Varrezat e Dëshmorëve në Gjakovë, pranë lapidarit “Shokët e Lirisë”, në varrezat e Dëshmorëve në Shqiponjë, si dhe në rajonet e ndryshme të Komunës së Gjakovës.
Gjithashtu, është shënuar edhe 16 vjetori i çlirimit të fshatit Shqiponjë, ku në një Akademi rasti, organizuar nën patronatin e Komunës së Gjakovës, fjalë rasti ka mbajtur nënkryetari i Komunës së Gjakovës, Ramadan Hoti, i cili ka vlerësuar lartë sakrificën e Dëshmorëve dhe kontributin e dhënë nga luftëtarët e lirisë për lirinë e Shqiponjës, Gjakovës dhe mbarë Kosovës.
“Ky vend i Dushkajës së Gjakovës, për çdo trim u bë ideal, duke reflektuar dritën e ndonjë vendi të shenjtë, se këtu u jetua dhe u përjetësua për liri. Në këtë vend uniforma e lavdisë u lartësua me sakrificën dhe trimërin e djemëve të brigadave 132 “Myrtë Zeneli” dhe 135 “Agim Zeneli”, formacione ushtarake të cilat I treguan armikut vendin dhe e bënë të kuptoj se Shqiponja dhe Gjakova të gjallë nuk dorëzohen”, tha ndër të tjera nënkryetari Hoti.
Poashtu fjalë rasti në këtë përvjetor kanë mbajtur edhe deputetët e Kuvendit të Kosovës, Rexhep Selimi, Daut Haradinaj dhe Pal Lekaj.
