Të dielen, edicioni i 70 i kërcimeve nga Ura e Fshenjt

Të dielen(neser)  prej ores 16.00  në brigjet e Drinit të bardhë , mbahen garat tradicionale të kërcimeve në ujë nga Ura e Fshenjtë. Ky është edicioni I 70 me radhë që flet për traditën e gjatë. Për  Urën  e Fshenjtë  është thurur legjenda, njëra  ndër më të bukurat e letërsisë popullore shqiptare dhe kjo legjendë është  kultivuar me legjendat e trimave të lartësive që pushtojnë qiellin.

“Njerëzit që hedhën nga lartësitë e mëdha,   më tepër u takojnë trupave që vijnë nga qielli. Thonë,  ndoshta ata kanë lidhje me perënditë…” kishte thënë Ali Podrimja, poeti ynë i shquar,  që ndër të parët sprovojë kënaqësinë që sjellë kërcimi atraktiv nga lartësia e kësaj ure.

Ndërtimi i kërcimores skaj Urës, viteve të fundit  ka nxitur të rinjtë që veten ta sprovojnë edhe nga lartësi më të ulëta se sa Ura. Niveli më i lartë i kërcimores është 13 metra dhe aty,  në ditën e garave,  do të zhvillohen edhe kërcime në stilin dallëndyshe dhe kërcime akrobatike. Organizatorët kanë thënë se trimat e lartësive neser sprovojnë talentin, guximin, elegancën rinore duke marrë pjesë në garat tradicionale të kërcimeve atraktive në ujë nga Ura e Fshenjtë dhe se e diela   është një ditë e veçantë që vetëm këto gara dinë të ofrojnë për adhuruesit e këtij sporti atraktiv, për notin, ujin dhe diellin.

Për shkak të pandemisë Covid 19, organizatori, klubi i notit Brigde Divers ka këshilluar:  Vendosni Maskën,  Mbani Distancën Fizike , mbani higjenën duke u kujdesur për vetën dhe të tjerët.

Të themi në fund se Garat i ka mbështetur komuna e Gjakovës , Drejtoria për Kulturë, Rini dhe Sport si dhe Ministria e Kulturës. Mysafir special do të jetë humoristi i shquar Sevdai Radogoshi.

Vitin e kaluar kampion i këtyre garave ishte Vedat Krasniqi.