Në Gjakovë është organizuar – Konferenca “Ditët e Biznesit të vogël – 2015’ me organizim të Ministrisë së Tregtisë dhe Industrisë, para së cilës fillimisht është zhvilluar takimi i kryetares së Komunës së Gjakovës Mimoza Kusari-Lila dhe Ministres së MTI Hykmete Bajrami.
Para gazetarëve kryetarja Kusari-Lila ka prezantuar sfidat me të cilat ballafaqohet biznesi në këtë rajon mirëpo edhe të arriturat që Komuna e Gjakovës ka implementuar dhe po implementon në kuadër të zhvillimit të sektorit të biznesit.
Kryetarja e komunës së Gjakovës Mimoza Kusari Lila ka kërkuar që sa më parë të legalizohet vendimi për Zonën Ekonomike të Gjakovës, nga se deri me tani mos kompletimi i anëtarëve të bordit në KPA, ka dëmtuar Gjakovën. Ajo më tutje ka shtuar se ne jemi të angazhuar dhe të interesuar që të funksionalizojmë zonën e lirë që Gjakova të jetë si qendër e shumë komunave andej e këndej kufirit. Në këtë kontekst, Komuna e Gjakovës ka themeluar Fondin për Grante të NMVM-ve i cili do të shërbejë si një ndërmjetësim mes nevojave të bizneseve dhe mundësive të Komunës dhe donatorëve për mbështetje financiare.
Ministrja e Tregtisë dhe Industrisë, Hykmete Bajrami, tha se , “Me nënshkrimin e Marrëveshjes së Stabilizim Asociimit janë krijuar mundësi të reja për depërtimin e bizneseve kosovare në tregjet ndërkombëtare, si dhe do të mundësohen investime në projekte të reja”, theksoi ministrja Bajrami, duke shtuar se do të punohet në plotësimin e standardeve për kualitet të cilësisë të produkteve kosovare, që do t’u mundësojë bizneseve qasje në tregjet rajonale dhe ndërkombëtare.
Ministrja Bajrami, gjithashtu i informoi bizneset gjakovare dhe se së shpejti do të krijohen mundësitë e lirimit të tatimit në fitim për periudhat të caktuara përmes pushimeve tatimore.
Ajo ritheksoi se Ministria e Tregtisë dhe Industrisë do të jetë cdo herë derë e hapur e adresimit të barrierave të bizneseve dhe njëkohësisht falenderoi donatorët që në vazhdimësi mbështesin projektet e ministrisë dhe ftoi bizneset të jenë pjesë aktive e të gjitha aktiviteteve.
Në fund të konferencës u shpallë ndërmarrja më e suksesshme në rajonin e Gjakovës, ndërmarrja prodhuese shërbyese “Conin”.
