Kryeministri i Kosovës Hashim Thaçi, i shoqëruar nga kryetarja e komunës Mimoza Kusari Lilai të premten e ka vizituar aeroportin e Gjakovës dhe me këtë rast ka thënë se tri shtete të Bashkimit Evropian kanë shprehur interesim që në aeroportin e Gjakovës të hapin një akademi të fluturimit, në të cilën do të trajnohen të rinjët kosovarë por edhe ata të rajonit.
“Kjo pritet të jetë një akademi ndër më të mëdhatë dhe më cilësoret në ballkan, prandaj qeveria e Kosovës në koordinim me qeverinë lokale të Gjakovës, do ta përzgjedhin me kujdes shtetin që do ta fitojë të drejten e hapjes së kësaj akademie”, ka thënë Thaçi.
Ai ka shtuar se kjo akademi qysh në fillim të aktivitetit të saj do të garantojë 100 vende pune, numër ky që do të rritet me kalimin e kohës. Sipas kryeministerit Thaçi, aeroporti i Gjakovës do të jetë shembull i mirë, pasi do të jetë pjesë kryesore e zhvillimit të kësaj komune.
E lidhur me zhvillimet e e ardhshme rreth aeroportit, kryeministri ka marrë mbështetje edhe nga kryetarja e komunës së gjakovës Mimoza kusari – Lila, e cila ka thënë se qeeveria e vendit do ta ketë mbështetjen e qeverisë lokale të Gjakovës në secilin vendim në të mirë të aeroportit.
“Ne si komunë jemi gati të bashkëpunojmë me Qeverinë e Kosovës në të gjitha hapat e funksionalizimit të aeroportit. Aeroporti si një aset me rëndësi strategjike është një potencial shumë i madh jo vetëm për Gjakovën, por edhe për rajonin, përfshirë këtu Shqipërinë, për një zhvillim të gjithëmbarshëm”, ka thënë Kusari – Lila.
I shoqëruar nga ministrat Besim Beqaj, Bernard Nikaj, si dhe nga drejtori i Autoritetit të Aviacionit Civil, Dritan Gjonbalaj dhe zëvendësdrejtori Kreshnik Gashi, Kryeministri Hashim Thaçi e përshkoi këmbë gjithë hapësirën e aeroportit dhe me këtë rast vizitoi kullën e kontrollit ajror, hangarin dhe pistën e aeroportit, duke u njohur nga afër me kushtet dhe mundësitë për operim që ofron Aeroporti i Gjakovës.
Kryeministri Thaçi theksoi se pas prezentimit të projekteve për Gjakovën, Qeveria e Kosovës ka nxjerrë vendimet për Zonën e Lirë Ekonomike në Gjakovë, si dhe tani po punojmë seriozisht për riaktivizimin e plotë të Aeroportit të Gjakovës, një projekt ky, siç e cilësoi kryeministri, shumë i rëndësishëm për Kosovën.
Pasi ka rikujtuar se Qeveria e Republikës së Kosovës para pak muajsh e ka marrë në pronësi këtë aeroport nga Qeveria italiane, Kryeministri Thaçi ka bërë të ditur angazhimin konkret të Qeverisë për këtë aset të rëndësishëm për vendin:
“E konfirmoj sot para jush, se kemi një përkushtim serioz, të një shteti evropian, për hapjen e një akademie të rëndësishme të fluturimit, që do të fillojë të operojë këtu në Aeroportin e Gjakovës. Një akademi e tillë e fluturimit do të jetë më e madhja e këtij lloji dhe me cilësorja në rajonin tonë, pra në Ballkan. Këtu do të kenë mundësi të trajnohen njerëz nga Kosova, por edhe nga rajonin dhe më gjerë. Ky projekt fillimisht do të ketë një mundësi për hapjen e 100 vendeve të reja të punës dhe pastaj gradualisht do të punohet edhe më tepër në këtë sektor” – theksoi z.Thaçi.
Më tej, Kryeministri Thaçi tha së gjatë vizitës në Aeroportin e Gjakovës ka takuar njerëz të aviacionit, njerëz entuziastë, që ëndërrojnë të jenë edhe pilotë në të ardhmen.
“Unë kam besim të plotë se ky aeroport do të jetë shembull edhe për Kosovën, edhe për rajonin. Do të jetë edhe një ndihmesë e madhe edhe për Gjakovën, për gjithë rajonin e Dukagjinit, por edhe më gjerë” – potencoi kryeministri Thaçi.
Gjatë deklarimit para mediave në njërën nga hapësirat e brendshme të Aeroportit të Gjakovës, Kryeministri Thaçi ka falënderuar kryetaren e Komunës së Gjakovës, znj.Kusari-Lila për bashkëpunimin. “Do të punojmë bashkërisht si Qeveri e Kosovës me autoritetet komunale, me mbështetjen e plotë edhe të miqve ndërkombëtar që të finalizojmë dhe të realizojmë këtë projekt të rëndësishëm” – tha Kryeministri.
“Gjakova ka traditë, mundësi, potenciale dhe ky potencial duhet të vihet në jetë, duhet të punojmë bashkërisht, në mënyrë që të lëvizim përpara. Jam optimist se kjo do të ndodhë” – u shpreh Kryeministri Thaçi
