Albulena Kryeziu Bokshi do ta drejtoi Teatrin e qytetit Hadi Shehu

Aktorja e shquar, Albulena Kryeziu Bokshi, do të drejtoj Teatrin e qytetit “Hadi Shehu” në vitet e ardhshme. Zgjedhja  e saj është bërë nga Këshilli Drejtues i Teatrit, pas konkursit që është hapur nga komuna e Gjakovës në tetor të vitit të kaluar. Përveç, Kryeziu-Bokshi për këtë post, kishin konkurruar edhe aktori, Behar Zenelaj dhe aktorja nga Gjilani, Aurita Agushi. Teatri i Gjakovës deri më tash është udhëhequr nga Edi Kastrati i cili tash e tutje do të vazhdoj si aktor në këtë teatër.

Drejtoresha e re, Kryeziu-Bokshi, sot  është pritur nga kryetari i Gjakovës, Ardian Gjini dhe drejtoresha për Kulturë,  Rini dhe Sport, Adea Roka ku u bë pranim-dorëzimi i detyrës së drejtorit të ri të Teatrit të qytetit.

Albulena Kryeziu, lindi më 27 gusht 1986 dhe është aktore kosovare e cila bëri debutimin e saj më 2003 në “Debati politik” në teatër. Ajo është e njohur për rolin e saj si Mimoza Ukaj në serialin televiziv Stinë Dashurie dhe Tringa Belegu në serialin “O sa mirë”. Ka interpretuar shumë role në skenat teatrore dhe të filmit.

Në vitin 2016, ajo fitoi çmimin “Aktorja më e Mirë” në “Mediterranean Film Festival” në Itali dhe në DC Festival, Francë. Në gusht 2016, ajo u martua me regjisorin Ilir Bokshi. Më 25 dhjetor 2017 ajo lindi djalin e tyre, Don Bokshi.

Teatri “Hadi Shehu” është nga institucionet më të rëndësishme në fushën e kulturës në komunën e Gjakovës.  Gjatë vitit të kaluar, trupa e Teatrit kishte përgatitur dy shfaqje, “Pornografi” të  autorit, Simon Stephens dhe me regji të Fatos Berishës si dhe shfaqjen “Kaligula” të autorit të njohur Albert Kamy, regjinë e së cilës e kishte bërë Kushtrim Mehmeti.