Mevlyde Saraçi, aktiviste, shkrimtare dhe ish – deputete e Kuvendit të Kosovës, para dhe pas luftës ka hapur të shtunën një ekspozitë me fotografi, në të cilën përmes aktivitetit të saj ka paqsyruar të gjitha angazhimet, mundimet, vuajtjet e sakrificat e bëra nga populli i Kosovës për një jetë më të mirë pa robëri, por me liri të merituar. “Unë vërtet kam qenë gati në të gjitha këto aktivitete, por unë jam vetëm një individ, në to keni qenë shumica prej jush që jeni sot këtu dhe mbi të gjitha kanë qenë edhe ata që kanë dhënë jetën e gjakun për këtë vend. Merita u takon atyre sepse ne kemi ende kohë të punojmë për të mirën e vendit dhe shtetit tonë”, ka thënë Saraçi, për të shtuar se kjo ekspozitë duhet të vlejë si histori dhe të vendoset në arkivat shtetrorë.
Krahas ekspozitës është promovuar edhe libri i përkthyer në gjuhen angleze i Saraçit “Kur jeta duhej jetuar”, në të cilën, njejtë si në ekspozitë, përmes autores dëshmohet për rrugëtimin e popullit të Kosovës deri tek liria e vet. “Femra krijuese, ndjeshmërinë e përkushtimit shpirtëror në përshkrimin e dramaticiteteve që e rrethojnë e kanë nga natyra më funksional dhe më plotësuese”, ka thënë gjatë promovimit shkrimtarja Naxhije Doçi, e cila e ka vlerësuar lartë këtë vepër, konkretisht formën e të shprehurit të autores Saraçi.