FC Liburn, krenaria e sportit jo vetëm gjakovar por më gjërë, është ndalur të martën në mbrëmje nga Mabetex Prishtina pasi barazoi 1 me 1 në ndeshjen e dytë gjysmëfinale të Kupës së Futsallit të Kosovës. Në ndeshjen e parë kishte pësuar humbje 3 me 2.
Rreth 1.500 adhurues të futsallit ishin mbledhur në pallatin e sporteve Shani Nushi duke mbështetur futbollistët e Liburnit, dhe duke i dhënë një hijeshi kësaj ngjarje sportive, po kjo nuk mjaftoi . Prishtinasit avancuan të parët kurse Mentor Mejzini barazoi në 1 me 1, rezultat ky që mbeti deri në fund, anipse u regjistruan edhe disa raste të qindpërqindta shënimi. Kur pritej që Ramadan Alaj të shënonte nga penaltia, dhe të krijohej mundësia për lojën shtesë, kjo nuk ngjau. Sonte fati ishte për mysafirët.
Presidenti i FC Liburn Abaz Beqa pas lojës tha se, krahas fatit edhe referimi I njërit nga dy gjyqtarët nuk ishte korrekt.
“ Rezultat jo real pasi qe loja ishte komplet ne anën e djemve ton por ja qe fati nuk ishte ne anën ton. Edhe referimi për mendimin tim ishte i njëanshëm nga ana e njërit refer arsyet nuk po i dimë sigurisht nga mikpritja e tepërt, kurse fc Prishtinës i urojmë fat ne ndeshjen finale. Vazhdojmë ne kampionat te pathyeshëm si gjithmonë krenar me ju djema”, ka deklaruar Beqa.
Ai ka falënderuar përzemërsisht tifozët gjakovarë, të cilët e stërmbushën pallatin, por që fatkeqësisht dolën të dëshpëruar.
“Sporti i ka këto. Mabetex Prishtinës i urojmë kualifikimin, e neve na mbetet të vazhdojmë të luajmë për synimin e madh titullin e kampionit, ” ka deklaruar Beqa.
