FC Liburn shënon 10 vjetorin me 4 tituj kampion dhe 3 Kupa

Klubi i futsallit Liburn,  të martën në mbrëmje,  me një ceremoni rasti shënoi 10 vjetorin e  themelimit dhe garave në futsallin kosovar. Kjo ceremoni erdhi pasi ditë më parë Federata e Futbollit të Kosovës këtë klub e shpalli më të mirin për vitin 2019, ndërsa dy futbollistë të saj, Ramadan Alaj dhe Alfred Prenqi u shpallën më të mirët në futsall.

Por , Abaz Beqa, president I klubit tha se , jo vetëm ky vit, por edhe të tjerët klubit I sollën 4 tituj kampioni,  3 Kupa të Kosovës  dhe 2 Superkupa.

“ Dy vite kemi prezantuar me sukses futsallin kosovar në arenën ndërkombëtare duke marrë pjesë në garat e Ligës së Kampionëve  dhe jmi radhitur në pozitën e 21 në Evropë. Synojmë të rangohemi në pozitat e para dhe të bëhemi klub tipik evropian”, tha Beqa, duke I lidhur këto suksese me angazhimin e futbollistëve dhe shtabit teknik, në radhë të parë e pastaj edhe të gjithë atyre që janë të lidhur për një dekadë me klubin “Kuq e Zi”.

Në këtë përvjetor në emër të Komunës së Gjakovës  ka përgëzuar udhëheqësi I sektorit të sporteve Faruk Domi. Ai tha se tradita për futbollin e vogël në Gjakovë ka nisur qysh para 100 vitesh, kur Faik Dushi solli topin e parë në Gjakovë,  dhe brez pas brezi ka shënuar suksese krahas futbollit të madh.

“ Sukseset e  këtij brezi të FC Liburn,  janë kuroëzim I punës së shumë e shumë brezave gjakovarë që më parë kanë qenë të talentuar në lojën e futbolit dhe kanë qenë shembull në gjithë vendin, “ ka theksuar Domi  duke lavdëruar punën dhe angazhimin e kryesisë së klubit me në krye Abaz Beqën.

FC Liburn në ceremoninë e sontme ka ndarë mirënjohje për gjithë ata që kanë kontribuar në arritjet 10 vjeçare të klubit.