Gjakova e Bajram Curri të shtunën do të jenë qytete që do të përshkohen me maratonën e Malësisë së Gjakovës. Komuna e Gjakovës si organizatore , e përkrahur dhe mbështetur nga shumë miq e adhurues të vrapimit, natyrës dhe Malësisë së Gjakovës, po i bëjnë përgatitjet përfundimtare për këtë ngjarje të rëndësishme që nisë ditën e shtunë.
Ideja e organizimit të Maratonës së Malësisë së Gjakovës, fillimisht ka nisur nga iniciativa e kryetares së komunës së Gjakovës Mimoza Kusari – Lila, e cila më vonë mori mbështetje edhe nga një grup i të rinjve të pasionuar pas vrapimit. Përmes vrapimit dhe promovimit të shëndetit të mirë synohet të promovohet edhe natyra e mbrojtja e ambientit, potencialet turistike si dhe zhvillimi i gjithëmbarshëm i komunës së Gjakovës dhe Malësisë së Gjakovës në tërësi.
Një ditë para maratonës me një letër gjithë pjesëmarrësve iu është drejtuar kryetarja e komunës Mimoza Kusari lila e cila thotë:
“Përmes vrapimit ju përpos që jeni duke e promovuar këtë sport si një aktivitet të shëndetshëm të jetesës, ju gjithashtu po kontriboni në promovimin e zonës së Malësisë së Gjakovës në territorin Kosovë-Shqipëri. Kjo zonë ka shumë për të ofruar, andaj ne urojmë që ju do ta shijoni këtë Maratonë jo vetëm si një garues/e por edhe si një turist/e që shijon bukuritë natyrore të kësaj zone.
Duke ju dëshiruar suksese, dua të ndaj një mendim nga përvoja ime:
Mbajeni në mend se përfundimi i një Maratone nuk është vetëm një arritje atletike, por është një gjendje mendore që thotë që çdo gjë është e mundshme.
Të theksojmë se Organizimi i maratonës së Malësisë tashmë ka hyrë në fazën finale, ndërkohë që organizatori ka hapur edhe një pikë të regjistrimit e cila
gjendet në Pallatin e Kulturës “Asim Vokshi”.
Ndërkohë kohë më parë ka nisur edhe pastrimi dhe pyllëzimi i gjithë shtegut të vrapimit, nga Gjakova deri në Bajram Curr. Vrapimi i maratonës do të nisë të shtunën më 15 tetor në orën 09.00 në qendër të qytetit në Gjakovë, ndërsa do të përfundojë të njëjtën ditë në qendër të qytetit të Bajram Currit. Përveç maratonës së plotë prej 42 kilometra e 195 metra, në kuadër të këtij aktiviteti sportiv, organizatorët kanë paraparë edhe gara në gjysmë maratonë 21 kilometra si dhe stafetë 4 herë 10 kilometra. Aktivitetet në kuadër të kësaj maratone do të vazhdojnë edhe në mbrëmjen e datës 15 tetor dhe ditën e nesërme , me organizmin e shumë aktiviteteve në Luginën magjepsëse të Valbonës.
