Saturday, February 3, 2024
Aktuale

GJAKOVA NË DITËT E PARA TË FESTËS SË VITIT TË RI

Gjakova ne festa

 

Ritmet festive të ndërrimit të moteve në komunën e Gjakovës kanë vazhduar edhe gjatë ditës dhe natës së parë të Vitit të Ri 2013,  ku janë këmbyer urime e përgëzime për një vit të mbarë, të frytshëm në jetë, punë e shëndet. Kemi përcjellë një vit jubilar, të 100 vjetorit të Pavarësisë së Shqipërisë me plot krenari dhe dëshira për arritje të reja të popullit shqiptar edhe në të ardhmen.  Edhe dollia qendrore  Vitit të Ri për Gjakovarët është ngritur me dëshirën për ngritjen  e mirëqenies sociale,  zhvillim ekonomik, hapje të vendeve të reja të punës  dhe rikthim të Gjakovës në një qytet me zhvillim të qëndrueshëm ekonomik.

 

Atmosfera festive e ndërrimit të moteve në komunën e Gjakovës edhe mbrëmë ka vazhduar në ambientet familjare dhe objektet hoteliere. Ambientet familjare edhe mbrëmë kanë qenë vend-qëndrimi më i preferuar i bashkëqytetarëve tanë, pjesa më e madhe e të cilëve kanë festuar me më të dashurit e tyre e të shoqëruar edhe nga ekrani televiziv. Një pjesë e bashkëqytetarëve tanë kanë shfrytëzuar qendrat turistike në Kosovë e  Shqipëri për të kaluar ditët e festës së Vitit të Ri.

 

Gjatë mbrëmjeve festive  janë treguar  mobile gjitha shërbimet e domosdoshme publike. Derisa shërbimi kujdestar i Stacionit policor në Gjakovë u kujdes për rendin dhe qetësinë publike, KEK-u ofroi  furnizim pa ndërprerë më energji elektrike sikurse edhe ngrohtorja e qytetit.  Punëtorët e pastrimit të kompanisë Çabrati janë parë në punë nga orët  e para të vitit të ri në pastrimin e ambienteve në qytet nga mbeturinat që si zakonisht mblidhen së tepërmi gjatë festave të këtilla.

 

Në shërbim  të qytetarëve ishin  edhe ekipet kujdestare të spitalit rajonal “Isa Grezda”, ata të Qendrës Kryesore të Mjekësisë familjare si dhe ata të shoqatës së zjarrfikësve në Gjakovë.

 

Gjatë 24 orëve në Repartin obstetrik të Spitalit “Isa Grezda” kanë lindur 5 foshnja. Infermierja Fitnete Polloshka theksoi se gjendja e foshnjave është e mirë, ndërsa fëmija i parë, vajzë ka lindë në ditën e parë të Vitit 2013 rreth orës 10.00.

Siç raportohet nga Qendra Emergjente e spitalit “Isa Grezda”, gjatë mbrëmjeve festive ka pasur shumë raste të kërkimit të ndihmës mjekësore. Mjeku kujdestar  Jetor Vorfi tha ky shërbim mjekësor ka qenë në gatishmëri të plotë dhe se gjatë dy mbrëmjeve të festës ka pasur mjaftë punë. Gjatë 24 orëve të fundit ka pasur 24 raste të ofrimit të ndihmës. Kryesisht kanë pësuar pacientë nga përdorimi i pakontrolluar i mjeteve piroteknike dhe përdorimi i tepruar i alkoolit. . Të mërkurën në mëngjes ka pasur edhe një rast të aksidentit në trafik ku fatbardhësisht ka kaluar vetëm me lëndime trupore. Tre nga të përfshirët në aksident në rrugën transite të Gjakovës,  kanë kërkuar ndihmën e parë mjekësore, njëri është lëshuar në shtëpi pas dhënies së ndihmës së nevojshme mjekësore, ndërsa dy të tjerë kanë ngel për trajtim të vazhdueshëm në repartin krirugjik.

Ndryshe Atmosfera festive do të vazhdojë edhe sonte e nesër. Për këtë janë përkujdesur restorantet hoteliere, kafeteritë dhe diskotekat të cilat me programe muzikore dhe meny të pasur do ti presin mysafirët edhe gjatë dy netëve të ardhshme.

 

Institucionet publike të enjten  nisin ditën e parë të punës në Vitin e Ri 2013. “Gjakovapress”  ju uron punë të mbarë e të sukseshme në shërbim të qytetarëve.  Ndërkaq shkollarët edhe këtë javë vazhdojnë pushimet dimërore për ti hyrë të gatshëm gjysmëvjetorit të dytë që nga fillimi i javës së ardhëshme. Padyshim se më të gëzuarit do të jenë gjimnazistët gjakovarë të cilët, mësimet do ti vazjdojnë në objektin e ri dhe modern të gjimnazit Hajdar Dushi.