Programi i Edukimit Bazik , një projekt i USAID-it që po realizohet së bashku me Ministrinë e Arsimit, e që ka për qëllim të ngrejë shkathtësitë tek nxënësit si dhe përmirësim të cilësisë së arsimit ka përfshirë qindra nxënës krijues të rinj meqë pjesë e këtij programi është edhe gara në film. Në këtë edicion kanë konkurruar 50 filma në shkolla të ndryshme të Kosovës, ku vogëlushët gjakovarë janë të treguar të suksesshëm.
Filmi i shkurtër me titull Syzet e Erës i përgatitur nga nxënësit e klasës e katërta tetë (IV-8) në shkollën fillore “Zekrija Rexha”, ka fituar vendin e parë, në një garë që është organizuar nga USAID-i. “Syzet e Erës” ka konkurruar në kuadër të filmave që promovojnë miqësinë . Konkurrentë kanë qenë nxënësit nga klasa e parë deri në klasë të pestë. Ndarja e shpërblimeve është bërë në sallën e shkollës së muzikës Prenk Jakova në Gjakovë ndërsa në këtë ceremoni janë ndarë edhe shpërblimet për filma edhe në katër kategori të tjera. Tri shpërblimet e para kanë mbetur në Gjakovë, ndërsa dy, për nxënësit e Prishtinës. Shkolla “Zekirja Rexha” ka
marrë shpërblimin për filmin më të mirë me krijimin “Sara Mollëkuqe”. Një çmim i parë ka shkuar edhe për nxënësit e shkollës “Fehmi Agani” në Gjakovë. Ata janë shpërblyer për dramën më të mirë me projektin “Pula e vogël kuqaloshe”.
“Jemi shumë të kënaqur për realizimet që kemi pasur për këtë garë. Në fillim kemi menduar që do të marrim aplikime nga nxënësit më të vjetër, por jemi befasuar kur kemi marrë aplikime më shumë nga klasat më të ulëta”, ka thënë udhëheqësi i programit të USAID-it, Keith Prenton.
