Gjakovën e vizituan afro 6 mijë turistë

Një nga fushat ku mundë të krijohen të ardhura të mira në komunën e Gjakovës është edhe turizmi. Gjakova nuk ka det por ka një numër të madh të objekteve të trashëgimisë kulturore dhe të natyrës. Atraksioni më i madhi mbetet kompleksi Çarshia e Vjetër ndër më të mëdhatë në Ballkan dhe me një arkitekturë atraktive i gërshetuar me objekte fetare, rrugicat karakteristike dhe gjurmët e zejtarisë që dikur ka lulëzuar në këtë zonë.

Sipas zyrës informative të turizmit në Gjakovë, gjatë këtij vitit qytetin e Gjakovës e kanë vizituar afro 6 mijë turistë, prej të cilëve prijnë polakët dhe çekët. Këto vizita po realizohen edhe në kuadër të paketave turistike të lidhura me Valbonën e Shqipërisë. Kapacitetet ekzistuese të vendosjes së turistëve nuk e kalojnë numrin prej 300 shtretërve.

Për trendet e turizmit në qytetin e Gjakovës, udhëheqësi i Zyrës së Turizmit në Gjakovë, Kujtim Rrahmani  thotë se ato janë pozitive por duhet punuar akoma më tepër në krijimin e parakushteve, nga krijimi i zinxhirit të shërbimeve  nga transporti dhe mënyra e arritjes në Gjakovë, vendosja në hotele apo bujtina, përgatitja e ushqimit tradicional dhe atij bashkëkohor e deri te ciceronët dhe materiali i bollshëm promovues i turizmit gjakovarë.