Myrta dhe Basha kthehen në folenë e vjetër

FC Vëllaznimi ka arritur që brenda këtij pushimi  mes sezonal të përforcohet me 11-të futbollistë .  Yll Myrta nga KF Besa dhe Ardi Basha nga FC Prishtina, janë përforcimet e radhës të FC Vëllaznimi. Ata të premten, kanë nënshkruar për klubin ku kanë marrë afirmimin dhe pasi kanë nënshkruar kontratat për këtë stinor që vjen, kanë thënë se do të angazhohen për të realizuar misionin e vështirë për inkuadrim në superligë.
Me këtë rast, nënkryetari i klubit Artan Muhaxhiri i ka uruar mirëseardhje dy ish-futbollistëve që hapat e parë i kanë bërë në klubin kuqezi nga Gjakova.
Yll Myrta ka falënderuar Besën nga Peja për konsideratën që ka pasur me rastin e lirimit nga kontrata një-vjeçare dhe ka thënë se Vëllaznimin e pret një sfidë e madhe në pranverë.
Edhe, ish anëtari i FC Prishtina, Ardi Basha ka thënë se ngecja që ka aktualisht Vëllaznimi në tabelë, mund të kompensohet me punë, angazhim dhe me qasjen e re që është vërejtur te FC Vëllaznimi.
Të shtunën dhe të dielën Vëllaznimi zhvillon ndeshjet e para kontrolluese. Nesër prej orës 14.00 në stadiumin e qytetit luan me Prishtinën ndërsa të dielën në stadiumin ndihmës t e Pallati i Sporteve luan me ‘2 Korrikun’.