Sonte fillon Festivali I Këngës në RTSH, sfidohen Florenti dhe Festina

Dy interpret të shquar të muzikës nga Gjakova, Festina Mejzini dhe Florent Abrashi do të jenë pjesë e Edicionit të 59-të të  Festivalit të Këngës në RTSH, i cili  nis sonte udhëtimin në transmetim televiziv. Do të jenë 25 krijime nga autorë dhe interpretues, në garë për të lënë gjurmën e tyre në fondin e muzikës shqiptare, si edhe për ëndrrën drejt Roterdamit në edicionin e ardhshëm të Festivalit Europian.  Në një skenë të pazakontë, të vendosur në mjedis të hapur, organizatorët dhe pjesëmarrësit kanë sfiduar vitin që gjunjëzoi ekonominë dhe shëndetin e globit prej covid 19. 

Për Festina Mezini kjo pjesëmarrje e tretë në Festivaline Këngës është me shumë përgjegjësi pasi vjen me një bashkëpunim emrash të mëdhenj të muzikës siç janë kompozitori Flamur Shehu dhe poeti Jorgo Papingji. Vetë kompozitori Flamur Shehu është shumë optimist dhe besimplotë për interpretimin e Festina Mezinit në këngën “Kush je ti dashuri”.

Florent Abrashi si shumë fëmijë të brezit të tij mezi prisnin që të shihnin Festivalin e Këngës pasi në Kosovë nuk kishte një aktivitet kaq të madh për këngën shqip. Dhe tani ai ka realizuar një ëndërr duke qenë pjesë e Festivalit për të tretën herë. Kënga e tij “Vajzë” është një këngë me influencë british por me një miksim ku motivi shqiptar mbisundon. Bledi Shishmani ka krijuar tekstin dhe muzikën e kësaj kënge cila ka ardhur shumë natyrshëm edhe në vokalin e këngëtarit rocker Florent Abrashit.