Vëllaznimi me lojë dramatike ia shkakton humbjen e parë Pejës

Klubi i basketbollit Vëllaznimi në minutat e lojës shtesë ka shënuar fitoren e katërt radhazi, që ishte ndaj kampiones së Kosovës, Pejës. Njëherësh kjo ishte humbja e parë për verdhezinjtë në këtë kampionat pas shtatë fitoreve. Kuqezinjtë triumfuan 100:99 (27:28, 19:28, 26:21, 18:13, 10:9).

Vëllaznimi i motivuar dhe në një atmosferë spektakulare që u krijua nga tifozët, e nisën më mirë ndeshjen, me epërsi prej 17:11, por pejanët u rikthyen shpejt për të barazuar shifrat, ku deri në fund të çerekut të parë ishte lojë e barabartë, duke përfunduar 27:28. Megjithatë, në periudhën e dytë verdhezinjtë filluan shkëputjen, duke pasur epërsi deri në 13 pikë, 41:54, derisa pjesa e parë përfundoi 46:56.

Por, kuqezinjtë nuk u dorëzuan dhe arritën të rikthehen për të barazuar rezultatin dy herë në 65:65 e 70:70, kurse rezultati pas 30 minutash ishte 72:77. Por, në çerekun e katërt u zhvillua një dramë e vërtetë, ku në fund Malcolm Armstead shënoi dy pikë për 90:90, duke e dërguar ndeshjen në vazhdime. Edhe në vazhdime ishte sfidë shumë interesante, por kësaj radhe vendasit ishin më të vëmendshëm dhe detajet e vogla vendosën fituesin që përfundoi 100:99.

Te Vëllaznimi, Sammuel Sessoms kishte 30 pikë, tetë kërcime e tetë asistime dhe Jalen Ray 29 pikë e shtatë kërcime.

Pas Lojes Ray tha se ishte tifozeria që na dha zemër për tu angazhuar deri në sekondat e fundit. Jam i lumtur për këtë fitore të madhe, ka thënë Ray. Ndërkaq kryetrajneri Plantak, tha se, ekipi ka qenë i motivuar për fitore, dhe për këtë edhe ia arritëm qëllimit. “Ecim para në fitore të reja”, ka thënë Plantak pas takimit me Pejën.