Shumë vjet kërcyesit më të mirë të Gjakovës janë ftuar në gara ndërkombëtare në Mostar e këtë vit edhe në Ujëvarën e Jajces, por udhëtimi me viza e kosovarëve në Bosnje Hercegovinë po e pamundësojnë një pjesëmarrje të tillë. Kështu ishte edhe këtë vit. Pjesëmarrja kampionëve në vite nga kërcimet prej Urës së Fshenjtë në garat ndërkombëtare nga Ujvara e Jajces që u mbajtën me 6 Gusht, përkundër fteses, nuk është realizuar. Kjo sipas organizatorit të garave të Urës së Fshejtë, Artan Muhaxhiri, ka ndodhë për shkak të burokracisë së madhe në procedurën e vizave që e ka bërë të pamundur këtë proces. Katër kërcyes në ujë nga Gjakova, Florid Gashi, Shkelzen Goçi, Sali Riza e Avdyl Osmani, ishin ftuar që të marrin pjesë në edicionin e tretë të këtyre garave ndërkombëtare.
Muhaxhiri tha se organizatorët e garës në Jajcë, kanë bërë maksimumin e tyre duke trokitur edhe në dyert e Ministrisë së Punëve të Jashtme në Kantonin e Sarajevës por as këto përpjekje nuk kanë mjaftuar duke arsyetuar se shkuarja mund të realizohet vetëm nëse aplikimi për vizë në ambasadën boshnjake në Shkup, do të bëhej 2-3 muaj përpara.
Vite më parë ka ndodhë edhe me ftesat që bëheshin nga organizatorët e garave më të vjetra të kërcimeve nga Ura e Mostarit.
