Deri sot 3 mijë e 538 bashkëqytetar të vaksinuar-Vaksinat e ardhshme brenda dy jave

Procesi i vaksinimit  në Gjakovë, me 800 dozat e arritura për personat mbi 65 vjeç është përmbyllur përkohësisht, për tri ditët e fundjavës së shkuar, ndërsa ky proces pritet të vijojë në dy javët e ardhshme kur priten sasitë e reja të vaksinave. Në ndërkohë, nga e hëna nuk ka më vaksina ndërsa të interesuarit po shkojnë në QMF për të marrë këtë shërbim. Deri me tash në komunën e Gjakovës janë vaksinuar 3 mijë e 538 bashkëqytetar mbi moshën 65 vjeçare dhe punëtorët shëndetësor. Kështu ka deklaruar dr. Aferdita Spahiu Shllaku, drejtoresha e Shëndetësisë në komunën e Gjakovës. Ajo e ka vlerësuar si të suksesshëm  këtë proces, ndërsa ka bërë thirrje qytetarëve të çdo grup-moshe që të regjistrohen dhe të aplikojnë përmes platformës e-Kosova për marrjen e vaksinës kundër COVID-19.

“Deri me tash procesi i vaksinimit që nga fillimi, ka ecur mirë. Qytetarët duhet të vaksinohen sepse vetëm në këtë mënyrë do të vie fundi I pandemisë. Nuk duhet të ketë tollovi dhe për këtë duhet të regjistroheni në E-Kosova.  Brenda dy javëve do të vijë një kontingjent i ri e pastaj Ministria e Shëndetësisë do të ndaj komunave. Na është thënë se kontingjenti ri duhet të vijë brenda dy javëve, por të mirëseardhura janë edhe më herët. Qytetaret  do të njoftohen me kohë”, tha Spahiu Shllaku.