Monday, June 10, 2024
Kulturë

Lyra Pylla pianistja që synon skenat e mëdha të muzikës klasike

Koncerte të talenteve të reja

Vetëm 17 vjeç e mori guximin të prezantohet para artdashësve të muzikës klasike me koncert recital. Pianistja e re Lyra Pylla në përfundim të vitit shkollor si nxënëse e klasës së 11 –të,  për 40 minuta performoi vepra të autorëve Bach, Haydn, Chopin e Schubert. Publiku prezent në sallën koncertale të shkollës së muzikës ,,Prenk Jakova “në Gjakovë e mirëpriti lojën e saj duke e inkurajuar që të vazhdojë të sjellë të tilla koncerte , pse jo edhe më të arrira.

Vet Lyra pas koncertit tha se është ndjerë shumë mirë sidomos pas duartrokitjeve sepse, sipas saj, ato treguan se interpretimi ishte në nivel. Po ashtu ajo tha se ky koncert ishte planifikuar të mbahej vitin e kaluar por për shkak të pandemisë është shtyer. Një falënderim të posaçëm ajo bën për profesoreshën e saj Tringa Siqeca e cila ka punuar me të për shumë vjet vetëm që të arrijë të sjellë një nivel sa më të larët të interpretimit. Përndryshe Lyra qysh 5 vjeç ka dalë në skenë dhe atë hiq më pak se në spektaklin ,,Albanian Got Talent “në Tiranë duke shkuar deri në finale, pastaj në moshën 6 vjeçare ka marrë pjesë në musical ,,Oliveri Kosovar”. Aktive përherë në skenë ishte me korin e fëmijëve që udhëhiqej nga Astrit Pallaska, e kjo e ka përgatitur atë që të dijë të përshtatet me skenën dhe të ambientohet me të ndër vite. Të shumta kanë qenë garat ku ajo ka marrë pjesë e ka zënë edhe vende të para si në Prishtinë, Shkup e Shkodër. Vet pianistja thotë se ka shumë synime. Meqenëse tashmë është maturante i ka vënë synim vetes që të vazhdojë në nivele tjera të përgatitjes profesionale, po angazhohet shumë që vitin tjetër të konkurrojë në ndonjërën akademi prestigjioze Evropiane.

Lyra zotëron dy gjuhë të huaja anglishten dhe gjermanishten të cilat janë kusht për të aplikuar nëpër universitete të njohura.( Gjakovapress)

Leave a Reply

Your email address will not be published. Required fields are marked *