Është përmbyllur edhe një edicion i Mitingut të poezisë në Gjakovë, kësaj radhe me jehonën e fjalës së bukur poetike skaj lumit Krena, të parës shkollë shqipe në qytet dhe në sheshin e bukur të poetit të madh Ali Podrimja. Poezia me titull “Numëratori i dhimbjes” e Odise Plakut ka marrë çmimin për poezinë më të mirë në mbrëmjen qendrore të Mitingut të 52-të të Poezisë ku poezitë e veta i lexuan 22 poet nga të gjitha trojet shqiptare.
Pas një jave të promovimit të librave dhe tryezës me temën “Poezia sot” manifestimi unik letrar përfundoi punimet mbrëmë në sheshin Ali Podrimja në pranin e një numri të konsiderueshëm të poetëve dhe adhuruesve të fjalës së shkruar.. Shkrimtari i madh Xhevahir Spahiu mori çmimin “Din Mehmeti” për veprën më të mirë, “Udha”.
Ndërsa poetja Helena Halilaj mori çmimin “Yllka Domi” si krijuese debutuese në këtë manifestim letrar.
Mbrëmja e poezisë në ambientin e bukur e të hapur të sheshit Ali Podrimja ishte një nga risitë më të këndshme të kësaj ngjarje unike të poezisë, të cilët e
madhështuan me interpretime artistike edhe Sokol Hidersha, bariton-solist në Teatrin e Operas dhe Baletit në Tiranë si dhe në piano profesoresha Nezahate Shala e me interpretim të poezive nga ana e aktores Elida Shasivari.
Fillimisht të pranishmit i përshëndeti dhe rrugëtim të mbarë krijimtarisë së tyre poetike ua uroi Gentiana Muhaxheri, kryetare e klubit letrar Gjon Nikollë Kazazi, ndërsa Meriton Ferizi, drejtor i kulturës rinisë dhe sporteve të Gjakovës u tha poetëve dhe mysafirëve se Gjakova ndjehet krenare me Mitingun e Poezisë dhe ndjehet e nderuar me dhuratën më të madhe që poetët i falin krijimtarinë e tyre këtij qyteti.
Ndryshe dita qendrore e Mitingut, filloi me homazhe dhe nderim për ata që e nisën dhe kontribuuan në këtë traditë, për t’ vazhduar me Orën letrare për fëmijë, me Karvanin e Shkrimtarëve që ishin mes e nxënësve të shkollës “Zekeria Rexha” dhe të shkollës fillore “Yll Morina”.
Pasdite, në sallën solemne të Pallatit të kulturës “Asim Vokshi” u mbajt tribuna letrare me temë “Poezia shqipe sot”, ku me kumtesat e tyre u prezantuan studiuesit e shquar:Ymer Çiraku, Dhurata Shehri e Lili Sula. Profesoresha Dhurata Shehri tha se poezia shqipe është përkrah poezisë bashkëkohore evropiane.
Për poezinë shqipe, unike në të gjitha trojet shqiptare foli edhe profesori nga Tirana, Ymer Çiraku.
Profesoresha Lili Sula i bëri një vështrim krijimtarisë së Ismail Kadaresë për të cilin është shkruar më shumë se për cilindo tjetër. Kjo sipas Sulos dëshmohet me veprat e tij artistike që qarkullon në 45 gjuhë të botës, si dhe receptimi kritik me mbi 5000 tituj. “Ismail Kadare përfaqëson autorin kanonik të padiskutueshëm, veprat e të cilit nuk konsumohen në një periudhë kohore e në një hapësirë të caktuar, po përfaqësojnë vlera të tilla estetike që një kulturë e qytetërim ka për detyrë t’i ruajë e t’i trashëgojë për të përkufizuar identitetin e vet letrar dhe kulturor e për t’u integruar denjësisht në vlerat artistike europiane e botërore. Vepra kadareane, me mbi 120 botime të para në gjuhën amë dhe mbi 1200 botime e ribotime në gjuhë të huaja, është vepra më e madhe në letërsinë shqipe dhe përfaqësuesja më e denjë e saj në letërsinë botërore” tha Sula në tryezën e Mitingut në Gjakovë. Të theksojmë në fund se pas tribunës letrare, adhuruesit e librit patën rastin të vizitojnë ekspozitën me libra të botuar nga Akademia e Shkencave e Shqipërisë, ku nga Vilma Proko u prezantua edhe Fjalori Enciklopedik”.
