Universiteti publik i Gjakovës “Fehmi Agani të hënën organizoi ceremoninë e diplomimit të 24 studentëve të parë, ku pos drejtuesve të këtij institucioni të larë arsimor në Gjakovë, si dhe përfaqësuesve tjerë komunal , kanë marrë pjesë edhe përfaqësues të institucioneve më të larta arsimore të Kosovës. Duke ju drejtuar të pranishmëve, rektori i Universitetit “Fehmi Agani”, Shaban Buza ka thënë se jo rastësisht është zgjedhur ky muaj për ta organizuar këtë solemnitet të rëndësishëm për arsimin e lartë jo vetëm në Gjakovë sepse ky është muaji i lindjes së Profesorit dhe Akademikut të respektuar Fehmi Agani, emrin e të cilit ka nder ta ketë Universiteti i Gjakovës.
“ Me arritjet Tua mburremi edhe ne, por njëherë edhe obligohemi të punojmë në vazhdimësi në ngritjen e cilësisë me përvetësimin dhe futjen në jetë të metodologjive bashkëkohore të mësimdhënies dhe hulumtimit. Diplomimi është kurorëzimi i përpjekjes së përbashkët të studentit, familjes dhe personelit akademik, ka thënë rektori Buza.
Në anën tjetër Ministri i Arsimit, Shkencës dhe Teknologjisë së Kosovës, Arsim Bajrami, duke përgëzuar studentët është shprehur se, kjo është një ditë e kurorëzimit të një pune të suksesshme të gjeneratës së parë, që tregon se sa ka qenë i arsyeshëm themelimi i këtij Universiteti, i cili mban emrin e njërit nga kolosët e arsimit shqip, njërit nga arkitektët e shtetndërtimit dhe të pavarësisë së Kosovës, akademik Fehmi Agani.
“Kjo gjeneratë që sot po promovojmë, do të jetë një shtytje e madhe për studentët, në mënyrë që Universiteti i Gjakovës të jetë një universitet modern, i cili siguron standarde të larta të cilësisë, i cili mundëson që studentët jo vetëm të diplomohen, por edhe të punësohen, që nesër të jenë liderë të së ardhmes”, tha Ministri. Ai ka premtuar mbështetje akoma më të madhe për Universitetin e Gjakovës. ;
Padyshim se më të lumturit ishin të diplomuarit e brezit të parë të Universitetit Fehmi Agani.
Studentja e sapodiplomuar Hana Daija u shpreh e lumtur që ka diplomuar në këtë universitet që njëkohësisht ka mbështetur punën shkencore të tyre. Jam e lumtur që diplomava në Infermieri .Universiteti na ka ndihmuar në vazhdimësi. Shpresoj që dijen time ta pasqyroi në punën time gjatë punësimit” ka thënë Daija.
Universiteti i Gjakovës ka filluar punën në vitin e parë akademik 2013/2014, ndërsa sot ndau diplomat për 24 studentë të diplomuar të gjeneratës së parë të Fakultetit të Mjekësisë, drejtimi i Infermierisë, njëherësh ndau edhe mirënjohje për studentët bursistë të Fakultetit të Edukimit, Fakultetit Filologjik dhe të Mjekësisë.
Aktualisht në këtë universitet veprojnë tri fakultete: Fakulteti i edukimit pastaj ai Filologjik si dhe Fakulteti i mjekësisë, në të cilat fakultetet studimet i vijojnë rreth 2 mijë e 800 studentë, prej të cilëve rreth 600 është numri i studentëve të cilët këtë vit e kanë filluar vitin e parë të studimeve.
