Për të dytin vit me rradhë, nga e hëna deri me 15 shtator, në Gjakovë mbahet festivali Komedia Fest, i cili ashtu si zakonisht do të ngërthejë në vete shfaqje teatrale nga zhanri i komedisë, muzikë, ekspozita dhe panaire të ndryshme. Aktiviteti parë ka qenë në mesditë me panairin e produkteve bujqësore në Çarshinë e Vjeter, ka vazhduar me bashkëbisedimin e adhuruesve të humorit me aktoren e shquar Leze Qena, ekspozitën e pikturave të Iljaz Avdiut dhe komedinë e Teatrit profesionist të Gjakovës “Revolveri”.
Edhepse binte herë pas here shi, në kompleksin e Carshisë së Vjetër u mbajt mbrëmje rinore me disko muzikë.
Organizatorët e këtij manifestimi, kanë premtuar se edicioni i dytë i festivalit do të jetë dukshëm më i fuqishëm dhe më atraktiv për vizitorët, pasi në këtë edicion janë futur disa risi shtesë.
Risi nga viti i kaluar do të jetë edhe organizimi i takimeve të përditshme me ikonat e komedisë shqiptare, në të cilat adhuruesit do të mund të takohen e të bashkëbisedojnë pa protokoll me emrat më eminent të këtij zhanri teatral. Adhuruesit po ashtu do të kenë mundësi që një ditë pas shfaqjes, të takohen me komplet trupën e shfaqjes dehe të bashkëbisedojnë lirshëm me ta.
Ndryshe, organizatorët kanë paralajmëruar se i kanë marrë të gjitha masat që në edicionin e dytë ta eleminojnë të vetmen dobësi nga edicioni i kaluar, zhurmën gjatë shfaqjeve. Ata kanë thënë se dyert do të mbyllen15 minuta para orës 20:00, pra para se të fillojnë shfaqjet, ndërsa në menyrë kategorike nuk do të lejohet hyrja e personave nën moshën 18 vjeqare.
Qëllimi i këtij aktiviteti që tashmë veçse ka hyrë në rrugën e të qenit aktivitet tradicional është ringjallja e jetës kulturore në qytetin e Gjakovës dhe pasi të gjitha aktivitetet tjera mbahen në Çarshinë e vjetër, edhe ringjallja e kësaj pjese atraktive të Gjakovës.
