Gjakova e bardhë!

Më në fund ra borë edhe në Gjakovë. Gjakova u bë e bardhë të  martën në mbrëmje rreth orës 22.00 pas një ere të fuqishme e shoqëruar edhe me reshje shiu  në një dimër që u karakterizua me shumë pak reshje. Në vendet malore bora ishte  me intensitet më të lartë, ndërkaq në qytet shtresa e bores nuk ka kaluar 5 centimetra që nuk ka qenë punë e vështirë për borëpastrueset . Të gjitha rrugët e Gjakovës janë të pastruara dhe nuk ka vështirësi në trafik.

Komuna e Gjakovës  në faqen e saj zyrtare ka njoftuar se,  me fillimin e reshjeve të borës, që nga nata e mbrëmshme, Komuna e Gjakovës përmes operatorit ekonomik, ka intervenuar në të gjitha ato rrugë ku ka qenë e nevojshme.

“Prioritet i’u është dhënë rrugëve kodrinore – malore siç janë fshatrat Goden, Babaj Bokës, Jabllanicë etj. Nesër pritet të ketë ulje të temperaturave. Komuna e Gjakovës, konkretisht Drejtoria për Shërbime Publike është e përgatitur nëse do të ketë nevojë të intervenohet me hedhje të kripës”, thuhet në njoftimin e Komunës.

Në Policinë Rajonale të trafikut në Gjakovë thanë se të gjitha rrugët janë të qarkullueshme dhe se trafiku po zhvillohet pa ndonjë vështirësi, ndërkohë që nga shoferët kanë kërkuar të jenë të kujdesshëm posaçërisht në orët e mëngjesit dhe natën kur në rrugë ka shtresa akulli.

Ndryshe gjatë 24 orëve të shkuara në rrugët e Gjakovës, Rahovecit dhe Malishevës kanë ngjarë 3 aksidente, fatbardhësisht vetëm me dëme të vogla materiale.

Sipas parashikimeve të motit reshje më intensive të shiut dhe  borës mundë të  pritet edhe ditëve në vijim. Reshjet e pakta këtë dimër bënë që të bien nivelet e liqeneve që shërbejnë për furnizim me ujë duke ngjallur frikë për mungesë të tij në sezonin e verës. Kurse për prodhuesit bujqësorë shiu dhe bora e mbrëmshme është e mirëseardhur.