Rrugët e Gjakovës sot kanë qenë më të qeta dhe nuk ka pasur tollovi sikurse ditëve tjera në markete e para bankave. Qytetarët mbi moshën 16-vjeçare, nga dita e sotme kanë qarkulluar vetëm një orë e gjysmë në ditë. Koha e tyre e daljes jashtë shtëpive u përcaktua në bazë të numrave të parafundit personal. Sipas vendimit të fundit, dalja jashtë shtëpive duhet të bëhet vetëm me arsye, për të kryer ndonjë shërbim apo për furnizim. Në Stacionin policor në Gjakovë thonë se këto vendime maksimalisht po respektohen, anipse në ditën e parë disa ende kanë paqartësi dhe nuk kanë informacione të bollshme.
Komandanti i Stacionit Policor në Gjakovë, major Tush Markaj i tha Radio Gjakovës, se dje ka pasur disa raste të tollovive nëpër markete dhe para bankave por sot gjendja është ndryshe.
“Nga sot policia është e fokusuar për të implementuar vendimin për planin e ri të Ministrisë së Shëndetësisë që ka të bëjë më lëvizjen e lirë të qytetarëve. Policia, krahas punëve të përditshme po angazhohet edhe që tu dalë në ndihmë institucioneve të ndryshme, posaçërisht institucioneve financiare, tek të cilat kohë pas kohe ka fluks më të madh të qytetarëve, “ka thënë Markaj.
Sipas tij në përgjithësi qytetarët po respektojnë vendimet e fundit të institucioneve. Komandanti i Stacionit policor në Gjakovë, Tush Marku ka bërë thirrje qytetarëve që të vazhdojnë të respektojnë vendimet e Qeverisë, për të tejkaluar së bashku këtë gjendje për një kohë sa më të shkurtër kohore.
“Të punojmë sëbashku për ta përballuar situatën me pandemi sa më suksesshëm”, ka porositur Markaj.
