Monday, April 15, 2024
Intervista

Interviste me piktorin Sulejman Kadrija- 60 vjet krijimtari

 

 

ARTI, PIKTURA DHE SHKENCA ËSHTË DASHURIA DHE IDEALI IM

 Sulejman Kadrija 03

Ku i gjen frymëzimet për pikturat?

Frymëzimet për të pikturuar i gjejë nga jeta e përditshme,  nga natyra,  nga fatkeqësitë natyrore, nga lufta dhe dukuri tjera.

 

Çka të ka nxit t`i përkushtohesh pikturës?

Arti, piktura dhe shkenca është dashuria dhe ideali im jetësore, por edhe jeta ka ndikuar që të bëhem piktor. Ne vendin tonë të jesh piktor nuk është lehtë por është sakrificë, por kam lindur për art dhe jetoj për artin. Piktura është pjese e jetës sime, ambientit tim dhe familjes sime.

 

Keni pasur një takim të veçantë me piktorin e madh Ibrahim Kodra. Çfarë mundë të na thoni për këtë vizitë?

Në vitin 1959 në muajin maj kam pasur një vizite në shtëpinë time (Gjakovë-Atele) nga piktorin Ibrahim Kodra, piktor bashkëkohor shqiptar nga Shqipëria  i cili me dekada ka punuar dhe krijuar ne Milano (Itali).  Gjate vizitës në atele me Kodren kemi biseduar për artin shqiptar dhe artin bashkëkohore, pastaj  është njohur me punën time, ka vështruar shumë vepra,  të cilat i kisha ne atele dhe sipas mendimit të tij në atë kohë,  veprat e mia kanë vlerë artistike dhe janë vlerësuar pozitivisht nga Kodra sidomos portretet, natyrat e vdekura, kompozicionet e tjera. Me mjeshtrin Kodra i kam pas dhe disa takime tjera në Prishtinë,  në Deçan,  në koloninë e piktoreve Kosovarë dhe në Gjakovë.

 

Çfarë kanë paraqitur pikturat në ekspozitën e fundit që u hap me rastin e Ditës së Çlirimit të Gjakovës?

Ekspozita kolektive e tre piktoreve të qytetit të Gjakovës e cila është hapur për festen e çlirimit të Gjakovës,  në Pallatin e Kulturës me 14 qershor 2012,  ka pasqyruar edhe një herë vlerat artistike të qytetit. Te gjitha pikturat e ekspozuara kane rolin dhe rëndësinë e vetë,  por duhet veçuar pikturat apo veprat e mia te cilat i kam përzgjedhur për këtë ditë të veçantë. Shumë nga pikturat kanë historinë e vet apo ngjarjen që identifikon. Pikturat kanë përfshirë tri dekada pune artistike si: arkitekturën e vjetër të qytetit, natyrën, represionin ndaj Kosovës, dhunën, plagosjen dhe vrasjen e qytetareve të Kosovës dhe lirinë tonë siç janë: “zogu i plagosur”, “pasojat e fuqisë”, “portreti i plagosur”, “motiv nga dukagjini”, “zogjtë e lirisë” dhe tjera.

 

Çka ju lënë përshtypje nga ekspozita e fundit?

Ekspozita ka qenë e hapur disa ditë dhe ka pasur shumë vizitor të cilëve ju kanë lënë përshtypje pikturat e ekspozuara nga tre artistet e qytetit (Sulejman Kadrija, Iljaz Avdiu, Xhevdet Spahija).

Takimet me burrat e shteteve në ekspozitë ishte një takim i veçantë dhe shumë i rëndësishëm për mua. Kujtimi do të mbetet me ish kryetarin e Kroacisë Stipe Mesiq, ish kryetarin e Shqipërisë Alfred Moisiun dhe Kryetarin e Komunës  Pal Lekaj, ish nxënës imi. Si shenjë respekti për këtë vizitë kam ndarë dy piktura dhuratë për këtë delegacion të cilët kanë respektuar artistët dhe veprat tona të ekspozuara gjatë vizitës.

 

     Cilat janë planet për të ardhmen?

Planet për të ardhmen janë përqendruar tek botimi i monografisë personale, në mënyrë  që të pasqyrohet veprimtaria artistike gjashtëdhjetëvjeçare në fushën e artit pamor. Do të mundohem që në një të ardhme të afërt do të hape një ekspozitë vetëm me vizatime të cilat janë realizuar në vitet fillestare te krijimtarisë dhe të cilat pasqyrojnë arkitekturën e vjetër kosovare si objektet, kullat, pjesë të lagjeve nga shumë qytete të Kosovës dhe të cilat janë mjaft interesante.