Thursday, March 28, 2024
Aktuale

Këshilltarët Komunal për Universitetin e Gjakovës dhe Shtegun memorial

Asamblea

Këshilltarët e Kuvendit Komunal të Gjakovës edhe një herë , në mbledhjen e parë të Asamblesë Komunale për këtë vit, të mbajtur të enjten,  paralajmëruan  se do ta bëjnë zyrtare kërkesën drejtuar Qeverisë së Kosovës dhe Ministrisë Arsimit për të mundësuar krijimin e universitetit  publik në vend, meqë konsiderojnë se ky qytet është qendër edukimi edhe për pjesën veriore të Shqipërisë.

Kryesuesi I Kuvendit Komunal Xhavit Alija tha se  kjo iniciativë e kryetarit të komunës ka kaluar në Bordin e Drejtorëve dhe Komitetin për Politikë dhe Financa dhe ka për qëllim që ti dërgohet zyrtarisht Qeverisë së Kosovës, personalisht kryeministrit të Kosovës dhe Ministrisë së Arsimit.

“Hapja e Universitetit Publik në Gjakovë do të ndikojë në arsimin e brezave të rinj dhe krijimin e kuadrove të reja” tha Alija. Këshilltarët njëzëri e aprovuan këtë kërkesë.

Anipse ishte jashtë pikave të rendit të ditës, më së shumti u debatua për Shtegun memorial të Gjakovës që do të ndërtohet në parkun qendror të Gjakovës. Këshilltarja Saranda Hyseni, kryetare e Komisionit tha se ky komision ka sjellë përfundim se në Shtegun memorial, duhet të spikasin figurat më të ndritshme të atdhetarisë nëpër të gjitha etapat, por që në veçanti duhet të zënë vend periudha e Ushtrisë Çlirimtare të Kosovës. Këshilltari Astrit Haraqia ka kërkuar që projekti I vënies së përmendores së ish komandantit të Ushtrisë Nacional Çlirimtare të Kosovës, Fadil Hoxhës dhe veprimtarit të shquar Anton Çeta, të realizohet sipas vendimit të vitit 2003, ndërkohë që këto dy figura të mos hyjnë në projektin e Shtegut memorial.  Pas debateve të shumta u mor vendim që me këtë çështje,akoma më tepër të merret Komiteti për Politikë dhe Financa me mbështetjen e ekspertëve të kësaj fushe.