Wednesday, April 3, 2024
AktualeLajme

Ku janë shportat e mbeturinave?

Shportat

Kur bora mbulon rrugët dhe sheshet humbin mbeturinat që I hedhim rrugëve. Mirëpo dielli nxjerrë gjithë pakujdesinë tonë që e tregojmë duke hedhur mbeturinat vend e pavend.  Kur i vendosen rreth 140 shportat e mbeturinave nëpër rrugët e qytetit, ky ishte një sihariq për hapat e drejtë në mbajtjen e pastërtisë dhe higjienës nëpër ambientet publike, mirëpo nuk kaloi shumë dhe ato filluan të dëmtohen qoftë  nga kalimtarët, por edhe shoferët e pandërgjegjshëm. Aktualisht më shumë se gjysma e këtyre shportave të mbeturinave mungon.

Të ballafaquar me këtë problem, zyrtarë të Drejtorisë së Shërbimeve Publike kanë identifikuar një numër të konsiderueshëm të dëmtimeve të shportave të vogla të mbeturinave në vendet më të frekuentuara publike si dhe dëmtimin e drunjve dekorativ. Dëmtime të tilla, thonë ata,  janë kryer sidomos gjatë festave të fundvitit, ndërsa  bëjnë të ditur se së shpejti do të nisë riparimi i shportave.

“Këtë radhë do të porosisim shporta metalike  më të qëndrueshme” tha Bernard Frrokaj, drejtor I Drejtorisë së Shërbimeve Publike, duke shtuar se tash e tutje furnizimi me to do të bëhet në mënyrë kontinuele gjatë gjithë vitit. Sipas tij deri më tash për furnizim me shporta janë hapur tenderë

kohë pas kohe, ndërsa tash e tutje do të kërkohet një furnitor vjetor. Sa i përket shportave të mbeturinave përgjatë rrugës kryesore, ato ekzistuese që mundë  të riparohen do të riparohen ndërsa mbi 50 të reja do të vendosen në vendet adekuate. Nga Drejtoria e Shërbimeve Publike apelohet për përgjegjësi dhe vetëdijesim të qytetarëve për mosdëmtime të mëtejme si dhe për mosabuzim të shportave të mbeturinave të cilat janë vendosur për kalimtarë rasti dhe jo për deponi të vogla mbeturinash të atyre qytetarëve të pandërgjegjshëm të cilët edhe  mbeturinat familjare i hedhin në ato shporta të vogla,  duke i prishur imazhin qendrës së ngushtë të qytetit.

Në anën tjetër, siç thonë në Drejtorin e Shërbimeve publike,  me krijimin e kushteve klimatike, në stinën e pranverës do të bëhet edhe rimbjellja e drunjve dekorativ në ato lokalitete ku ka patur dëmtime, ndërkohë që gjatë vjeshtës janë mbjellë një numër i madh i drunjve të tillë. Zyrtarë të kësaj drejtorie thonë se,…” Nëse synojmë të kemi një qytet të pastër e të gjelbëruar atëherë të gjithë kemi obligim që të kujdesemi për të, meqë është në të mirën e përgjithshme”.