Mirëpritet komedia “Kolonel Zogu”

Është pritur shumë mirë nga publiku gjakovar, premiera e komedisë “Kolonel Zogu” e cila u dha te enjten mbrëma në teatrin profesionit të Gjakovës. Nxjerrë nga teksti i autorit bullgar Hristo Boytchev dhe me regji nga Erson Zymberi, shfaqja ka përshkruar një situatë sa komike aq edhe tragjike gjatë luftës së dytë botërore.

Në një manastir të harruar diku në malet e Bullgarisë, një grup të çmendurish arrijnë të organizohen në një tog ushtrie dhe të papenguar ta bëjnë një udhëtim nëpër Ballkan e Evropë, deri në Strasburg të Francës. Në rolin kryesor, atë të kolonel zogut është paraqitur aktori i ri Bujar Ahmeti, loja e të cilit është pritur shumë mirë nga publiku.

Po ashtu me duartrokitje të mëdha është përcjell edhe loja e aktorit Ylber Bardhi, i cili me disa moment tejet komike i ka dhënë fuqi tërë shfaqjes. E përveç Ahmetit dhe Bardhit, në këtë shfaqje janë paraqitur edhe Myrvete Kurtishi, Edmond Hafizademi, Altina Kusari, Ylber Mehmeti dhe Valon Pallaska.

Pas shfaqjes, regjisori i saj Erson Zymberi tha se është mrekulluar me publikun gjakovar dhe me lojën profesionale të aktorëve të Teatrit të Gjakovës, prandaj ka shtuar se një institucion i tillë meriton përkrahje shumë më të madhe institucionale.

Ndryshe, sipas drejtorit të Teatrit Profesionist të Gjakovës, Edi Kastrati, po punohet që premiera e ardhshme të jetë diku në muajt nëntor apo dhjetor. /radiogjakova.info/