Në Bashkësinë e parë lokale të qytetit
Bashkësitë Lokale dhe funksionimi tyre
Intervista: Mevlyde Saraçi, kryetare e Bashkësisë së parë lokale
Funksionimi i Bashkësive Lokale në komunën e Gjakovës, pas një periudhe të gjatë, është mirëpritur nga qytetarët për faktin se janë pikat e para të ballafaqimit me hallet e përditshmërisë, rrugëve, ujësjellësit, trafikut, kanalizimit, ndriqimit, tereneve sportive, aktiviteteve kulturore e tj.
Ne do të mundohemi që në faqet e revistës Gjakovapress, përmes kryetarëve të zgjedhur, të prezantojmë hallet dhe preokpimet e të gjitha bashkësive lokale të Gjakovës. Kemi filluar me Bashkësine parë lokale.
Si ta njohim më mirë Bashkësinë e parë lokale?
Bashkësia e parë lokale përfshin një hapësirë të konsiderueshme të qytetit. Si pikë fillestare është ndërtesa e PTK-së në anën e djathtë në rrugën kryesore që shkon deri te ndërtesa e Metalikut të vjetër, ndërsa në anën e majtë deri te pika e zezë ku përfshihet edhe Rrezina veriore.
Pra kjo Bashkësi përfshin mëhallën e Qerimit dhe vazhdon deri te përroi i Llukacit, përfshin stacionin e autobusëve, pastaj vazhdon kah barakat e Erenikut dhe deri te rruga e vjetër për Prishtinë. Është karakteristikë se në këtë Bashkësia gjendet ish shtëpia e mallrave, ndërtesa e hidrosistemit “Radoniqi”, stacioni i autobusëve, Çerdhja e fëmijëve, Shkolla e mesme e ulët “Zekeria Rexha”, Qendra e mjekësisë familjare, Stacioni i zjarr fikësve të qytetit, etj. Bashkësia e Parë lokale përkufizohet me Bashkësinë e katërtë, të pestë dhe të gjashtë lokale.
Bashkësia e parë lokale ne periudhën e pas luftës po rritet si me numër të banorëve po ashtu edhe me ndërtesa të reja individuale, por edhe kolektive.
Kjo Bashkësi Lokale ka një histori të dhembshme me pasoja të mëdha nga lufta e fundit në Kosovë. Çka mundë të na thoni?
Bashkësia e parë lokale ka qenë shënjestër e sulmeve serbe mbi shqiptarët dhe në të ka ndodhur një ndër masakrat më të mëdha në Kosovë më 2 prill 1999 e më pastaj edhe një tjetër më 16 prill 1999. Masakra e 2 prillit 1999 apo si quhet tanimë masakra në shtëpinë e Vejsave shënon krimet më ç‘njerëzore që u bënë ndaj banorëve të kësaj lagjeje nga mosha njëvjeçare e deri në 70 vjeçare. Pastaj masakra në pjesën afër stacionit të autobusëve dhe në lagjen Sadik Stavileci. Të gjitha këto masakra i bënë banorët serbë e malazez, të cilët kanë ardhur si kolonë pas luftës së dytë botërore dhe të cilët e kanë njohur mirë çdo pëllëmbë të kësaj Bashkësie dhe të përkrahur nga policia, ushtria dhe paramilitarët serbë. Kjo Bashkësi lokale numëron mbi tetëdhjetë të vrarë dhe të masakruar dhe ka edhe dëshmorë, të cilët kanë rënë në luftën çlirimtare me armë në dorë. Është vështirë të përshkruhet me pak fjalë historia e dhimbshme e banorëve të kësaj pjese të qytetit. Secila nga këto familje kanë një tregim të veçantë dhe të tmerrshme për krimet dhe masakrat serbe mbi popullatën civile.
Ne shpresojmë se me mbështetjen e kryetares së komunës së Gjakovës, Znj. Mimoza Kusari Lila, të fillojmë ndërtojmë një lapidar arkitektural, si satisfaksion për familjet e të rënëve dhe të gjithë banorëve të kësaj bashkësie të cilët e përjetuan natën e thikave dhe krimet më barbare. Pastaj jemi duke mbledhur shënime, deklarata e fakte, me të cilat do të bëjmë kallëzim penal kundër kriminelëve që ushtruan dhunën dhe krimet mbi banorët e pafajshëm. Ne si BL lokale sivjet më 2 prill kemi bërë një organizim institucional në përkrahje të komunës ku janë bërë homazhe dhe janë përkujtuar martirët dhe dëshmorët.
Cilat janë hallet më të mëdha të banorëve të kësaj bashkësie lokale?
Kjo Bashkësi lokale ka shumë halle siç kanë edhe banorët tjerë të komunës sonë. Edhe pse duket që e ka të rregulluar infrastrukturën, përsëri ballafaqohet me mungesën e saj në rrugë të ndryshme e më konkretisht në Rrezinë është një mungesë totale e infrastrukturës. Banorët e kësaj pjese ( Rrezinës veriore), për çdo ditë ankohen për mungesë të rrugëve, të kanalizimit, ujësjellësit, mungesës së parkut, etj.
Sa po arrini të jeni zëri i halleve të banorëve të bashkësisë suaj lokale?
Ne jemi zgjedhur si përfaqësues të bashkësisë lokale muaj më parë, por funksionimi ynë numëron pesë muaj që nga certifikimi nga komuna. Është një periudhë relativisht e shkurtër e angazhimeve tona dhe në vazhdimësi jemi duke bërë identifikimin e nevojave të banorëve.
Kemi filluar të kontaktojmë banorët nëpër lagje dhe po bisedojmë më për së afërmi për hallet e tyre. Mbi të gjitha në këtë Bashkësi lokale ka pa punësi të theksuar dhe raste sociale që nuk janë trajtuar për shkaqe dhe arsye të ndryshme, pastaj mungesa e kushteve për shkollimin e fëmijëve, mungesa e bursave për studentët, sëmundjet e rënda dhe mungesa e mjeteve për trajtimin dhe shërimin e pacientëve , mungesa e strehimit etj.
Kam obligim qytetar dhe moral që të identifikojmë më saktësisht të gjitha nevojat e kësaj Bashkësie dhe të bashkërenditura t’i dorëzojmë në komunë në drejtoritë përkatëse për trajtim dhe realizim.
Cilat janë planet e mëtejme të krijimit të kushteve më të mira të jetës dhe punës në këtë zonë?
Edhe kjo zonë varet nga zhvillimi i përgjithshëm ekonomik në komunë. Ndërkaq sa i përket kushteve më të mira për jetesë varet nga buxheti i komunës, buxheti i Kosovës dhe strategjia komunale për investime kapitale, në bazë të projekteve dhe shumës së buxhetit.
Çfarë është bashkëpunimi me Kuvendin komunal?
Kuvendi komunal ka vendosur një formë të rregullt të bashkëpunimit me kryetarët e Bashkësive lokale përmes takimeve të rregullta dhe prezantimit të projekteve që janë në realizim dhe në pritje. Mendoj se puna më e madhe është në terren, aty ku identifikohen nevojat dhe kjo punë bëhet në baza vullnetare dhe varësisht nga disponimi dhe koha e anëtarëve të kryesisë që kanë shtrirje në terren.
Meqenëse është ndërtuar kjo formë komunikimi me kryetaren e komunës, Znj. Mimoza Kusari Lila dhe drejtorët e qeverisë komunale, jam shumë e sigurt se edhe hallet e banorëve, jo vetëm të kësaj Bashkësie lokale do të zgjidhen sipas mundësive buxhetore dhe prioriteteve.
Çfarë mendoni se duhet bërë në krijimin e kushteve më të mira për punën tuaj si kryetar të BL-së?
Si kryetare e Bashkësisë së Parë lokale, së pari punën dhe angazhimin e kam pranuar në baza vullnetare, për të ndihmuar në zgjidhjen e halleve dhe problemeve të banorëve dhe për të qenë zëri i tyre. Takimet me anëtarët e kryesisë i mbajmë në objekte të ndryshme, varësisht nga aktiviteti, ndërsa dokumentacionin të cilin e grumbullojmë gjatë aktivitetit e dërgojmë në komunë dhe arkivin e dokumentacionit e ruaj në shtëpinë time apo ndonjëherë edhe tek anëtarët tjerë të kryesisë. Shpresoj të kemi një pikë të përhershëm që do ta shfrytëzojmë si zyrë të gjithë kryetarët e BL. Kjo varet shumë nga komuna, kompetentë e saj të cilët kanë premtuar një gjë të tillë/
Ku mund të drejtohen banorët e zonës suaj për të biseduar për preokupimet dhe organizimet tjera kulturore e sportive Brenda BL-së?
Mendoj se për takime me banorë nuk e kemi problem, sepse mund të takohemi në objektin e shkollës ditëve të pushimit e për tubime më të gjëra e kemi në dispozicion çdo objekt të komunës. Ne si kryesi e bashkësisë së parë lokale jemi të gatshëm të ballafaqohemi me të gjitha sfidat dhe të jemi në përkrahje të banorëve të cilët edhe duhet të kërkojnë ndihmën dhe përkrahjen tonë. Shpresoj për një kohë të shkurtër do të kemi një pasqyrë më të qartë për projektet e filluara, të planifikuara dhe ato që presin realizimin në këtë katërvjeçar.
Do të angazhohemi edhe për pastrimin e të gjitha hapësirave të kësaj Bashkësie dhe të garojmë edhe për çmimin që do të dhuron komuna për ambientin më të pastër.
Unë jam shumë mirënjohëse për besimin që ma dhanë banorët e kësaj Bashkësie lokale dhe shpresoj se edhe ata do të më shoqërojnë mua dhe anëtarët tjerë të kryesisë në projektet që do t’i dërgojmë në komunë.