Tuesday, April 2, 2024
Lajme

Në Gradishë të Gjakovës dyshohet për varrezë masive

Varreza dyshohetNjë varrezë masive mendohet se është zbuluar të premten në fshatin Fshej të komunës së Gjakovës, konkretisht në një shpellë në lokacionin e quajtur Gradish, në afërsi të Urës së Fshejtë. Rastin e kanë konfirmuar edhe në stacionin policor të Gjakovës, por, aty nuk kanë dhënë ndonjë informatë tjetër.

Ndërkohë, në vendin e ngjarjes kanë dalë edhe pjesëtarë të EULEX-it, të cilët pasi kanë punuar për disa orë pa ndërprerë janë larguar nga vendi i ngjarjes me një çantë që mendohet të jetë e mbushur me mbetjet apo eshtrat e gjetura. Prokurori i EULEX-it Martin Hacket, i cili ka dalë në vendin e ngjarjes ka thënë se ende nuk dihet nëse bëhet fjalë për varrezë masive apo mbetje mortore. Sipas tij mbetjet e gjetura do të ekzaminohen në departamentin e forenzikes dhe pritet që brenda një jave të ketë informacione më të plota. Nga ana tjetër, eksperti i mjekësisë ligjore Arsim Gërxhaliu ka thënë se nuk bëhet fjalë për varrezë masive, por vetëm për disa mbetje të kafshëve.

Megjithatë, Gërxhaliu ka thënë se ka mundësi që në mes të këtyre mbetjeve të jetë edhe një kafkë njeriu e cila mund të jetë bartur deri në këtë lokacion nga kafshët. Ndryshe lokacioni i dyshuar i cili tashmë është i siguruar, që nga dje vazhdon të jetë nën përkujdesje të rreptë të policisë së Kosovës.