Janë intensifikuar aktivitetet bashkëpunuese mes dy qyteteve, Gjakovës dhe Pogradecit të Shqipërisë të cilat konkretisht do të realizohen me 19 Prill me një program të pasur të pjesëmarrëve të Pogradecit në Gjakovë. Në njohtimin e Zyrës për informim të KK të Gjakovës thuhet se : Kryetarja e Komunës së Gjakovës, Mimoza Kusari Lila së bashku me gjithë banorët e Komunës sonë, do të jenë nikoqirë për mysafirët nga Pogradeci të udhëhequr nga kryetari i Bashkisë, Artan Shkëmbi.
Pogradeci, është qyteti ku natyra nuk ka kursyer asgjë për të arritur të përkryerën, qyteti ku njerëzit me mikëpritjen e çiltërsinë e tyre nuk të lënë të largohesh pa marrur me vete dashurinë e mallin për t`u rikthyer përsëri. Qyteti i Lasgush Poradecit, Mitrush Kutelit e shumë emrave të tjerë, zbret me datë 19 prill në qytetin e Gjakovës. Shumë vlera dhe tradita do i shkëmbejmë së bashku, ku do të ketë prezantim turistik, kulturor, ekspozitë të fotografive të Pogradecit në Gjakovë. Veprimtaritë fillojnë në ora 18:00, në Pallatin e Kulturës “Asim Vokshi”.