Edhe gjatë 24 orëve të shkuara kanë vazhduar reshjet e shiut mbi territorin e komunës së Gjakovës, të cilat kanë sjellë edhe vështirësi të reja për disa zona ku zakonisht mblidhen sasi të mëdha uji apo edhe rrezikohen nga dalja e lumenjve nga shtrati. Lumi Krena është tejmbushur ndërsa edhe lumenjtë tjerë të Gjakovës kanë arritur nivele të larta. Disa shtëpi prapa “Jatex-“it sot janë nën ujë.
Në Drejtorinë për Mbrojtje dhe Shpëtim kanë raportuar vetëm për një rast të vështirësive me ujin e mbledhur në rrugën “Ded Gjon Luli” në lagjen Dardania, për çka kanë filluar të ndërmerren masa adekuate.
Drejtori i drejtorisë për Mbrojtje e Shpëtim Xhevat Rraci tha se janë në përcjellje të vazhdueshme të gjendjes pas reshjeve të pandërprera të shiut, por që deri me tash pos rastit në Dardani nuk ka ndonjë vështirësi më të theksuar. Ai ka thënë se në këtë aksion të përcjelljes së gjendjes, janë përfshirë edhe drejtorit të tjera komunale. rraci tha se varësisht nga gjendja në teren do të ndërmerren masat e nevojshme.
Reshjet e mëdha të shiut dhe ujit në disa zona të qytetit nuk po arrin ti kapërdijnë rrjetet e vjetruara të kanalizimit të ujërave të zeza dhe atmosferike. Krahas kapaciteteve të vogla absorbuese, në këtë gjendje gjithsesi se po ndikojnë edhe disa qytetarë të pandërgjegjshëm të cilët në rrjetin e kanalizimit po hedhin edhe mbeturina. Për pasojë në disa lagje janë shënuar edhe raste të depërtimit të ujit nëpër bodrume të shtëpive. Foto/Interaktiv- KTV faqja në facebook/