Nxënësit e Rahovecit në kuis para nxënësve gjakovarë

Në  kuisin e diturisë me titull  “Evropa 2013” që u organizua të merkuren në Gjakovë  për filloristët e grupmoshave 11deri në 15 vjeç nga komunat Gjakovë, Rahovec dhe Malishevë më të mirët u treguan nxënësit e shkollës “Bajram Curri” nga Rahoveci. Pesë anëtarët e grupit të kësaj shkolle treguan njohuri dhe shkathtësi më të mëdha se bashkëmoshataret e shkollës fillore “Yll Morina” të Gjakovës, “Sulejman Vokshi” të Rahovecit dhe shkollës “Kajtaz Ramadani” të Malishevës.

Në këtë veprimtari që e organizon Zyra e BE në Kosovë, në kuadër të projektit “Perspektiva evropiane në Kosovë”, e që synon promovimin e perspektivës evropiane të vendit tonë, kanë marrë pjesë rreth 160 nxënës të shkollave   të tetë regjioneve të Kosovës.  Nxënësit gjakovarë të shkollës “Yll Morina” ishin përzgjedhur nga Ministria e Arsimit të Kosovës.

Në ketë aktivitetet, që, në mbështetje të Ministrisë së arsimit në Kosovë po organizohen për të tretën herë, në mesin e nxënësve të 32 shkollave në vend,  morën  pjesë edhe 4 shkollat e regjionit të  Gjakovës ku hyjnë Rahoveci dhe Malisheva. Fituesi i garës së sotme vazhdon përpjekjet për të fituar finalen që mbahet në Prishtinë.