Nxënës nga Kolegji “Mehmet Akif” të Gjakovës në Ministrinë e tregtisë

“Kurrë mos keni frikë për punët dhe sfidat që mund t’ju dalim përpara, duhet të vazhdoni mësimet dhe të punoni, suksesi nuk do t’ju mungojë”. Këto ishin fjalët që zëvendëskryeministrja Mimoza Kusari – Lila i tha para nxënësve të shkollës fillore “Mehmet Akif “ të Gjakovës.

Ministrja Kusari – Lila i këshilloi nxënësit e kësaj shkolle, i informoi për punën dhe rrugën që ajo ka ndjekur deri në arritjen e pozitës që është sot, si dhe e informoi në pika të shkurtra për përgjegjësitë e Ministrisë së Tregtisë dhe Industrisë. “Askush nuk ka arritur të jetë lider shtetëror pa pas thyerje gjatës jetës, sfida të rënda, prandaj duhet ta keni të qartë që duhet të punoni shumë në mënyrë që të arrini suksese”, theksoi ajo.

Ndërsa, drejtori i Kolegjit “Mehmet Akif”, Ali Terjaki e informoi ministren me aktivitetet e shkollës që ai e drejton, me theks të veçantë projekte të ndërmarrësisë.

Ndërkohë, në takim, ministrja është pyetur nga nxënësit se cila është mënyra më e mirë për fuqizimin e femrave në Kosovë dhe dallimin e shkollimit në Kosovë dhe SHBA. Ministrja Kusari – Lila tha se për fuqizimin e femrave, thelbësore është edukimi, dëshira dhe guximi për t’u ballafaquar me sfida. Kurse shkollimi në Kosovë ka kaluar në periudha të vështira me sistem të rëndë, ku individi nuk është dëgjuar, përderisa në SHBA ishte e kundërta. Megjithatë, ajo vlerësoi se tani shkollimi në Kosovë është duke aplikuar metodologji të Evropës dhe SHBA- së.