Poetja Gentiana Muhaxhiri kryetare e klubit GJ.N.Kazazi
Kryesia e Klubit letrar “Gjon N. Kazazi”, të hënën ka njohtuar se unanimisht zgjodhi kryesuesen e klubit, krijuesen Gentiana Muhaxhiri. Në mbledhjen e rregullt vjetore, ku u prezantua raporti i punës, si dhe synimet për vitin që po hyjmë, kryesia e klubit letrarë, pas tërheqjes së Muharrem Kurtit nga pozita e kryetarit të klubit, për shkaqe shëndetësore, e synime tjera jashtë vendit, në këtë pozitë u zgjodh për kryetare të klubit Gentiana Muhaxhiri.
Interpretimi i statutit të klubit, jep mundësi për vazhdim të mandatit, në këtë pozitë, pasi që është bërë tërheqja e kryetarit të mëhershëm duke qenë ende në mandat. Kështu që, me votë unanime dhe me norma ligjore për kryetare me mandate tri vjeçar zgjidhet kryetarja e re. Përndryshe klubi përherë ka respektuar metodën e zgjedhjes me rrotacion të kryetarëve.
Gjatë kësaj mbledhje u falënderua ish kryetari Kurtaj, për punën me mjaft sukses që e kreu në kohën e tij si kryetarë, duke e plasuar Mitingun e poezisë, manifestimin më të madh të Klubit letrarë, në nivel të lartë të organizimit dhe në pjesëmarrje të shumë krijuesve ndërkombëtarë.
Gjatë kësaj mbledhjeje u hartua edhe platforma organizative për aktivitetet që do të bëhen gjatë vitit 2015, me theks të veçantë për Mitingun e poezisë, botimin dhe promovimin e shumë veprave të ndryshme.
Klubi ka qëllim kyçjen e një numri të madh të krijuesve të rinj dhe bashkëpunimin me shumë subjekteve kulturore në Kosovë, Shqipëri, rajon dhe shumë vende tjera evropiane. Qëllim parësorë mbetet botimi dhe promovimi i disa veprave letrare, me autorë të rinj, si dhe nxjerrja e revistës “Shtigjet”,që është organ i Klubit dhe ka pushuar së botuari prej vitit 1995.
Historia e klubit shënon një ndër subjektet më të vjetar në trojet shqiptare, ndoshta edhe më i vjetri që nuk ka pushuar me aktivitet asnjë vit. Dihet se Klubin e kanë themeluar shkrimtarë që kanë lënë emra në letërsinë shqipe, siç ishin Enver Gjergjeku, Din Mehmeti, Vehap Shita, Ali Podrimja, Jusuf Buxhovi, Teki Dërvishi, Mazllum Saneja, e shumë e shumë krijues tjerë që vazhdojnë edhe sot të jenë në vlugun e krijimtarisë dhe studimit.
Vetëm Mitingu i poezisë sivjet ka shënuar 50 vjetorin e themelimit, duke u rreshtuar ndër manifestimet më të mëdha poetike në rajon, në trajtim të temave me rëndësi për letërsinë, dhe në ruajtje të frymës krijuese për poezinë dhe krijimtarinë në tërësi.
Pas 50 vjetorit që u kremtua këtë vit, Klubi në vitin 2016, kremton e 60 vjetorit e themelimit, nga shumë emra me renome për letërsinë shqipe.
Gentiana Muhaxhiri lindi në Gjakovë, më 1984. Pasi botoi disa poezi nëpër gazetat e përditshme, botoi përmbledhjen me poezi “Ëndërrime”, ku janë përfshirë poezi me motive të ndryshme. Kritikët lerarë janë shprehur për të se është një poete e talentuar. Me librin “Ëndërrime” ka fituar çmimin “Yllka Domi”, që mbahet në Gjakovë… Libri i Gentiana H. Muhaxhiri: “Heshtje e trazuar,” u botua kohët e fundit në Rumani nga Amanda Edit, Bukuresht 2014.