Me rastin e një vjetorit të fillimit të punës së qeverisjes lokale në Gjakovë, kryetarja e komunës sëbashku me të gjithë drejtorët e drejtorive komunale e kanë mbajtur sonte një debat me qytetar. Në të cilin është prezantuar e tërë puna një vjeçare dhe sfidat me të cilat është ballafaquar kjo qeverisje. Në prezantimin e saj, që ka zgjatur rreth 1 orë e 15 minuta, kryetarja Mimoza Kusari – Lila ka folur pothuajse për secilin aktivitet të komunës së Gjakovës, ndërsa në mënyrë të veçantë ka përmendur punën e secilës drejtori veç e veç.
Si fillim kryetarja ka përmendur faktin se administrata komunale ka ulur dukshëm shpenzimet në krahasim me qeverisjen e kaluar. Sipas saj, vetëm për karburante gjatë vitit 2014 janë harxhuar rreth 77 mijë euro, apo rreth 183 mijë euro më pak se sa janë shpenzuar në vitin 2013. Në dreka e darka zyrtare, qeverisja Kusari – Lila ka harxhuar rreth 47 mijë euro, apo 73 mijë euro më pak se në vitin 2013.
Kusari – Lila ka folur edhe për projektet infrastrukturore të realizuara gjatë vitit 2014. Sipas saj edhe pse në krizë të rëndë ekonomike dhe me mbi 6 milion euro borxhe, komuna ka arritur të investojë rreth 700 mijë euro. E kur jemi tek borxhet, Kusari – Lila ka thënë se komuna ka paguar mbi 4 milion euro, nga mbi 6 milion euro sa ka qenë shuma e përgjithshme e borxheve.
Kusari – Lila ka folur edhe për pjesën e zhvillimit ekonomik dhe krijimin e vendeve të reja të punës, sektorë të cilat sipas saj hovin më të madh do ta kenë gjatë vitit 2015, ndonëse edhe gjatë këtij viti mund të thuhet se është bërë mjaft në këtë drejtim. Në këtë rast, Kusari – Lila ka përmendur dy linjat e reja prodhuese të cilat pritet që fillimisht të punësojnë rreth 120 qytetarë të komunës së Gjakovës. Pas raportit të kryetares, debati ka vazhduar me pyetje të shumta nga ana e qytetarëve.