Kontingjenti ushtarak i KFORit Italian, sot solemnisht i ka ndarë Radio Gjakovës një donacion me pajisje teknike, në mesin e të cilave një miksetë, pastaj kompjuterë, mikrofona e të tjera. Bëhet fjalë për përpjekjet e Radio Gjakovës për modernizimin e teknikës adekuat zhvillimeve bashkëkohore në këtë fushë. Në ceremoninë e zhvilluar me këtë rast, drejtori i Radio Gjakovës, Skënder Gola, duke e vlerësuar si shumë të rëndësishme këtë mbështetje, ka falënderuar përfaqësues të KFOR-it Italian për bashkëpunimin.
“Kontributi i KFOR-it italian në kompletimin e pajisjeve teknike të transmetimit për Radio Gjakovën ka nisur para më shumë se dy dekada dhe padyshim se ka pasur ndikim në krijimin e kushteve më të mira të punës”, ka thënë Gola.
Në anën tjetër, përfaqësuesi i kontingjentit italian të KFOR-it, nënkolonel Flaviano Maxhoni, ka thënë se KFORI- do të vazhdoi të ndihmoi aty ku ka nevojë:
“Qëllimi ynë është që të ndihmojmë të gjithë pa ndasi, për të jetuar gjithë në paqe e qetësi. Bashkëpunimi ynë me të gjitha radiot në Kosovë, siç është rasti me Radio Gjakovën, nuk do të përfundoj. Do ti ndihmojmë gjithë ata kanë nevojë. Është kënaqësi që ndodhemi këtu”, ka thënë Maxhoni.
Të theksojmë se në kohën kur Radio Gjakova po ballafaqohet me vështirësi të mëdha financiare, mbështetja nga KFOR-i italian me pajisje teknike, padyshim se do të krijojë kushte më të mira për punë.